Ym pat nud khih ki Rangbah Shnong, ba dang buhteng ka SC

Shillong, 13 Risaw:
Ka Synjuk Ki Nong-synshar Shnong ka Bri u Hynniewtrep (SNSBH) kam pat nang ban khih shano shano ruh namar ba ka mukotduma ban pynkhein ia ka rai ka Meghalaya High Court ka dang sahteng ha ka Kashari ba heh duh ka ri ka Supreme Court.
Hadien ba ka SNSBH ka la shu sngap ha kine ki sngi, u chairman jongka, u Dr Werlok Kharshiing u la ong ba, haduh mynta ki dang iai ap ban ioh shwa ia ka rai na ka Supreme Court halor ka kam Rangbah Shnong.
“Ngi dang iai ap shwa ia ka rai ban ioh na ka Supreme Court kaba la buh sngi ban shim bishar biang ia kane ka mukotduma ha une u bnai hi”, la ong u Dr Kharshiing haba iakren mynta ka sngi.
U la ong ba ha ki bnai ba la dep, ka Supreme Court ka la pynjlan sngi ban shim bishar ia kane ka kam bad la ioh jingtip ba ka la buh sngi ban shim bishar biang mynta u bnai tangba ym pat tip ia ka sngi.
“Lada pynkhyllem ka Supreme Court ia ka rai ka High Court, ka la mut ba ngi la ioh biang kumba ju long ia ka bor”, la ong u chairman ka SNSBH.
Ha kajuh ka por, u la ong ba ka SNSBH kam don kano kano ka jingiakren ne ka jingthmu ban pynlong biang ia ka dorbar bah kumba long ha u snem ba la dep.