Ym pat leh eiei ia ka skul ba pynpra ki pulit Assam ha Khliehumwang: Mayrald

Shillong: U bah Mayraldborn Syiem MLA ka seng Congress na Nongpoh konstitwensi u la ong ba ka sorkar kam pat leh eiei ia ka skul kaba la shah pynpra ha ki pulit Assam ha Khlieh Umwang. U bah Mayrald u la wanrah ia ka mat ia kren myn hynnin ka sngi ha ïng Dorbar da kaba sor ia ka khubor kaba la mih ha ka kotkhubor jong u Rupang kaba 27 tarik u rymphang kaba ong ‘Bym iarap ka sorkar, sher dara ka MC bad nonghikai ban shong ki khynnah skul’.
U MLA ka Nongpoh u la pynpaw ka jingsngewdiaw ba kum kitei ki jingjia dei kiba ju jia khah khah khamtam ha khappud ka Meghalaya bad Assam. U la ong ba katei ka dei ka mat kaba donkam bha ban ia kren namarba ka ia tyngkhuh ha khappud, u la ong ba ka skul Khliehumwang LP School kaba hap hapoh ka SSA ka la shah pynpra ha ki pulit Assam ha ka 10 tarik u nailar, 2018 hynrei haduh mynta katei ka skul ka sah kumjuh bad ka sorkar kam shym la shimkhia satia bad u la ong ba kane ka pyni ba ka sorkar kam don ia ka jingkitkhlieh. U la ong ba la bun bun bnai haduh mynta ym pat iohi dak satia ba ka sorkar kan leh eiei ia katei ka skul.
Utei u MLA na Ri-Bhoi u la ong ruh ba ka por ka iaid sted bha bad mynta ki khynnah skul ki la nangbun hynrei kaba sngew sangsot ka long ba katei ka skul kam don satia tang ka kamra klas ruh. U la ong ba ka jingioh ban pynlong skul mynta ruh ka dei lyngba ka jingtreishitom hi da ka Managing Committee, ka Dorbar Shnong ryngkat ki nonghikai kiba la pynieng ing skum tang ban long malu mala. Utei u MLA u la pynrem ia katei ka jingleh ki pulit Assam bad u la kyntu ia ka sorkar ba ka dei ban shimkhia noh kloi ia katei ka kam.
Haba jubab ia katei ka mat ba la wanrah da u bah Mayraldborn, u Myntri sorkar uba peit ia ka tnad pule puthi u bah Lahkmen Rymbui u la ong ba ka sorkar ka la lum jingtip bha ia kane bad kam dei ba kam pynleit jingmut hynrei ki kam ki dang iaid shakhmat na ka bynta ban pynbit pynbiang ia katei ka skul. U la ong ba ka sorkar ka la buh jingtyrwa na ka bynta ban pynrung pisa kyrpang ha kane ka mang tyngka na ka bynta katei ka skul. Ha kaba ia dei bad ki jingtei u la ong ruh ba kan ym don jingeh shuh nangne shakhmat naba la dep ban ia kren sngewthuh hapdeng ki ar tylli ki bor District kata ka Deputy Commissioner ka Ri-Bhoi bad u Deputy Commissioner ka West Karbi Anglong ba ki dei ban ia pyntip mar kylliang ia kino kino ki kam pynroi ha ki jaka ia ka jia khnang ba kan ym mih shuh kum katei ka jingpynduh pynum. U la ong ba kam dei ba ka sorkar ka leh klet hynrei ka dang leh ia ki kam ba ka dei ban leh.