Jowai: Ki shipai Navy kiba la wan ban iasnohkti lang bad kiwei de ki kynhun pyllait im ha ka jingjia shlei um ka par dewiong ha Khloo Ryngskan ha kaba 15 ngut ki la shah tap, kim pat lah satia ban sei ia ka met kaba la lap napoh ka krem. Ia katei ka met la lap lyngba ka kor ROV 280 phut shapoh ka krem khnai ha katei ka krem kaba jylliew 370 phut bad ki krem khnai kiba jrong 200 haduh 400 phut.
Kiba haiing hasem katba ki dang pdiang ia ka met u nongbylla tih dewiong
Mynta ka sngi, baroh shisngi ki shipai Navy ki la pyrshang ban sei ia katei ka met hynrei namar ka don bun ki jingeh, na ka jingdon ki pipes bad kiwei kiwei ki tiar ki tar nalor ka jingjngut palat ka um.
Ha kajuh ka por, ka jingtan ia ka um na ki krem dewiong barim kiba don marjan bad katei ka krem ka dsng iaid shait shait da ka Odissa Fire and Disaster Team, ka Coal India Limited bad ka Kirloskar Brothers Limited.
Ha ki 34 kynta la tan ia ka um haduh 4590000 litres haduh mynta ka janmiet Sngi u Blei.
Ia ki shipai Navy la iarap da ka kynhun National Disaster Response Force (NDRF).
Shuh shuh, ia ka met jong u Amir Hussain kaba la ioh ban sei nongkong napoh katei ka krem la aiti sha ka lok bad ka kmie jong u kiba la wan ban ithuh bad kam ia katei ka met.
Na ka liang ka bor District East Jaintia Hills ka la pynbiang ia ka kali kit metiap ban pynpoi ia katei ka met sha Pan bari, Chirang District jong ka jylla Asssm.