Wat hadien 10 sngi ba la shah tap um, ki 15 ngut ki nongbylla dewiong ha Ksan, thain Briwar ha Nongkhlieh Elaka, ki shipai NDRF bad ka kynhun SDRF kim pat lah satia ban sei ia ki metiap lane pyllait im na katei ka krem dewiong kaba jylliew haduh palat 370 phut.
Mynta ka sngi, kitei ki shipai ki la hiar sha katei ka krem ban jurip ia ka um, la ka duna ne em.
Kitei ki shipai ki lah ban ngam tang haduh 30 phut shapoh um, bad ka um haduh mynta ka don haduh kumba 70 phut bad ki dang iai ap ba ka um kan duna.
Ka bor District ka East Jaintia Hills ka dang ialeh shitom ban tan ia ka um napoh katei ka krem ha kine ki 10 sngi mynta bad haduh mynta ka sngi U Blei ka um kam shym la duna satia.
La suba jur ba ka lah ban dei na ka daw ba la samla lyngba lut ia kiwei pat ki krem dewiong lane ka um na ka thwei jong ka wah Letein ka la rung shapoh katei ka krem dewiong.
Ki riew stad naduh u Jaswant Singh Gill, ki briew jong ka Directorate jong ka Mining and Safety ki la wan poi sha katei ka jaka bad ki la ai jingmut ia ka bor District tang ban tan ia ka um da kaba pyndonkam da ki mashin kiba khlain bor.
Haduh mynta ki dang tan ia ka um tang da ar tylli ki kor tan um kiba 25 HP bad u Jaswant Singh Gill uba la ju pyllait im ia kiba shah tap hapoh krem u la ai jingmut ba dei ban wanrah haduh 10 tylli ki kor kiba 100 haduh 150 Horse Power (HP).
Mynta ka sngi, une u nonglum khubor u Rupang ha ryngkat ka jingdonlang u DC ka EJH la lap ba ka um kaba tan napoh katei ka krem ka la sma pyut bad la suba jur ba ioh lehse ka dei na ka daw jong kitei kiba sah kut bad kiba la iap hapoh katei ka krem dewiong.
“Ngi dang ap ba ka sorkar kan phah ia ki kor ba khlain ban tan ia ka um napoh katei ka krem”, la ong u wei na ki heh District.
Ha ka juh ka por na ka liang u DC u bah FM Dopth u la iathuh ba lashai ka sngi un leit ia kynduh ia kiba haiing ki lai ngut ki Pnar kiba la shah tap um hapoh katei ka krem bad ban air uh 1 lakh tyngka ka bai lutsan ba kyrkieh sha kiba ha iing jong ki.
U la ong ruh ba ka sorkar ka la pynbna ia kane bad u la khmih lynti ba kito ki ba haiing hasem ki lanot na Assam, West Garo Hills ruh kim wan mih sha Ophis jong u na ka bynta katei ka jingiarap kyrkieh.
