Ym pat lah ban thied ia ki ALS Ambulance, ba hap ioh pisa na Delhi, ong U DHS

Shillong: U Director ka tnad ka koit ka khiah u Dr Aman War, myn hynnin ka sngi u la iathuh ba ka jingbym pat lah jong ka sorkar ban thied ia ki Advanced Life Support Ambulance, na ka bynta ka jylla ka dei namar ba kane ka pisa ka dei kaba hap ban ia bei lang hapdeng ka sorkar jylla bad ka sorkar pdeng.

Haba ia kren bad ki lad pathai khubor, na ka liang u Dr War u la ong “Ka ingleh shitom ban pynioh ia ki 11 tylli ki ALS Ambulance ha ka jylla ka dang iaid sha khmat, hynrei ia kane kan dang shim por namar ba ka jingthied ia kane ka ambulance kan dei ka jingiabei pisa lang hapdeng ka sorkar jylla bad ka sorkar pdeng, kumta ka ne kan hap ban iaid lang bad tang shu la lah ban pyniabiang lang yn sa lah ban thied ia ki ALS Ambulance na ka bynta ka jylla”.

U Dr War, u la iathuh ba ha ka jylla mynta ki dang don tang 4 tylli ki ALS Ambulance, kawei ha Step down hospital ha Umsawli, kawei ha Shalang, kawei ha Laitkynsew kaba la ioh na SPDS bad kawei ka don ha NEIGRIHMS hospital.
Na ka liang u myntri ka tnad ka koit ka khiah jong ka sorkar jylla u bah Prestone Tynsong u la ong “Ka jingkynnoh jong ki liang pyrshah ngam kwah ban ong eiei, hynrei na ka liang jong ngi, ngi don hangne ban peit ia ka bha ka miat bad ka shong suk shong shngain jong ki nongshong shnong ha ka jylla bad kane ka dei ka thong kaba hakhmat tam jong ka sorkar”.

U la bynrap shuh shuh “Ngam ju sngap la ki kynnoh ne ki pyrshah lane ki ia bein bad ngi pdiang sngewbha ia kita baroh, hynrei kawei ka long ba ki team jong ka tnad ka koit ka khaih haduh mynta ki duh thiah duh dem bad uno uno u ba kynnoh ia kane u dei ban sngewthuh ba kim dei ban pynduh jingkyrmen ia u DHS , yn nai pynduh jingkyrmen ia ki Doctor kiba trei haduh ki PHC level, yn nai pynduh jingkyrmen ia ki nurse kiba trei haduh ki sub center level,yn nai pynduh jingkyrmen ia ki ASHA ki Aganwadi kiba la trei shitom khlem ioh thiah haduh mynta ban the lakam ia kane ka jingpang “.

U la kyrpad ia ki liang pyrshah ne ia kino kino ki sengsain pyrthei ban ym shu kynnoh ia ka jingtrei shitom jong baroh ki nongtrei ka tnad ka koit ka khiah, hynrei ka sorkar ka don sngap ia baroh ki jingai jingmut ki ban long na ka bynta ka jingbha jong ki paidbah ha ka jylla.