Ym pat jubab ka KHADC, ia ka jingpan jingshai ka MHA, ong u bah John

Shillong,9 Nohprah:
Ki mih ki jingeh kiba bun ha ka bor shnong, Raid bad Hima, ka ain long nongshong , ka ain rejistar khyndew ne die khyndew, ka ain halor ka jinglong trai ia ki mar pohkhyndew, ki khlaw ki btap, ki um ki wah, ka jingdon be-ain ka jingbatai shaphang ka Municipality of Shillong hapoh ka 6th Schedule, ka jingbsuhlang ia ki Khasi hapoh ka thup jong ki Schedule Tribe bad kiwei pat ki jingeh dei na ka jingbym shai bad ka jingbym treikam ka IOA*AA kaba dei ka nongrim jong ka jingiasnoh ki Khasi bad ka Ri India , ong u bah John F Kharshiing, Grand Council of Chief.
U bah John u la ong ba ka Federation of Khasi States ka la buddien ia katei ka kam la 68 snem mynta , hynrei katba ki seng saiñpyrthei kim ia syllok halor katei ka dulir ka long lehnohei ban ia pyrta jaitbynriew, ong biang u bah John.
U la ong ruh ba ki Khlieh nongsynshar ki la ioh kopi ia ka shithi kaba 18 tarik u naitung, 2012 kaba wan na ka Ministry of Home Affairs ( MHA) ka sorkar India kaba la phah sha ka sorkar jylla bad ka sorkar jylla pat ka la phah sha ka District Council ban pan jingshai naduh u nailur, 2012 hynrei haduh mynta ki bor ka district Council kim pat ai jingshai satia.
Katei ka jingbym shimkhia ban jubab ka la ktah ia ka hok jong ka Ri Khasi bad Jaintia baroh kawei, ong u bah John da kaba kyntu ruh ia ka KHADC ba kin shim khia ban jubap kyrkieh halor katei ka phang khnang ba ka Sorkar Jylla kin lah ban phah lem ia ka jingai jingmut halor katei ka mat.