Nongpoh: Ki paidbah kiba la kot da ki hajar ngut bad kiba la mih na ki dong bapher bapher ka thain Umsning, mynta ka sngi ki la pynlong da ka jingiaiaid paidbah na Umsaitsning sha Umsning bad pynkut ha Lad Mawrong, ban pynpaw ia ka jingpyrshah kaba jur bad dawa ruh ban pynshitom da kaba tyngeh ia uwei u briew, uba la leh beijot ia iwei u khyllung ba dang 4 snem ka rta kaba dei na ka shnong Lad Mawrong ha Umsning, kaba la wanrah ia ka jingtieng bad pynsuhjer ia ki paidbah ha ka thain Umsning hi baroh kawei.
Lah ruh ban kdew hangne, ba dei ha ka Sngi Thohdieng jong ka Taiew ba la dep ba utei u runar u bym shem la don shuh ia ka mynsiem briew, u la leh ia katei ka kam pap ka sang ia itei I khyllung ha kawei na ki Lum Jingtep kaba don ha katei ka shnong, hadien ba u la khot ia itei I Heprit sha katei ka jaka da kaba pynbiej da ki mit mit.
U nongleh beijot ia I Heprit ha Lad Mawrong, ki paidbah kiba la mih surok ban dawa kem mardor bad pynshitom da kaba tyngeh
Ha kane ka jingiaid paidbah kabala long mynta ka sngi, la wan iashimbynta da ki hajar ngut ki paidbah, kaba kynthup naduh ki riew rangbah, ki longkmie, ki khun samla lem bad ki khynnah skul, ha kaba ki la pynpaw ia ka jingpyrshah kaba jur halor katei ka jingjia bad ki la kyntu ruh ia ki bor ka Ain ba ki dei ban kem mardor bad ai ruh ia ka jingpynsaja kaba tyngeh pyrshah ia utei u runar uba dang phet rieh bad u bym pat iohkem da ki pulit tad haduh kine ki sngi.