Ym pat ioh tohkit ki pulit ia u nongialam ka BNP

Shillong, 24 Jymmang:
Ki pulit ka jylla haduh mynta kim pat ioh lad ban tohkit ia u Salah uddin Ahmed, u nongia lam ka BNP na ka ri Bangladesh uba la wan poi wir sha kane ka jylla. U Ahmed haduh mynta u dang don hapoh ka jing sumar ha North Eastern Indira Gandhi Regional Institute of Health and Medical Sciences (NEIG RIHMS), bad haduh myn ta um pat don ha ka met kaba khlain. “Ngim pat ioh ban tohkit ia u namarba u dang don hapdeng ka jingsumar” ong u SP City bah Vivek Syiem haba kren sha ki lad khubor. Katba ha ka sngi thohdieng pat ka lok jong u Salahuddin ka Hasina Ahmed ka la pan jamin na u 1st class judicial magistrate ban pyllait noh ia u , hynrei la iathuh ba ka kashari ka la buh sngi ban tian bishar ia u ha ka 29 tarik u jymmang, 2015 bad la pan ruh ia ka ripod na ki ophisar kiba tohkit. La iathuh ba shen ki pulit kin leit rah ia u Ahmed sha kashari hadien ba u la kham ioh bor.
Lah ban pynkynmaw ba ki pulit ki la ioh kem ia u Salahuddin na Golflink , Shillong katba u dang iaid wir ha katei jaka, Lah ruh ban pynkynmaw ba u Salahuddin u la ong ba um tip eiei ia ka jingwan poi jong u sha nongbah Shillong namar ba ha ka por ba la kit ia u ha ka kali la teh ia ki khmat jong u bad hadien ka jingiaid lynti kaba bun kynta la wan bret ia u sha katei ka jaka. U la kynnoh ba u la shah rahbor na ingsah jong u ha ka 10 tarik u lber, 2015.