Shillong: Ka jingjied ia ki ar ngut ki MP na ka jylla ka la kut mynta ka janmiet por 4 baje bad katkum ka jingkhein ba la aid a ka tnad elekshon, ka jingpoi ki nongthep vote ha Shillong parliamentary konstitwensi ka la long 63.56 percent katba ha Tura ka la long 75.60 percent. Hynrei kane kam pat dei kaba kut namar ba dang don sa katto katne ki jaka bym pat ioh jingkhein lut.
Ka jingkhein baroh kiba wan iashim bynta ha kane ka jingthep vote MP ka long 67.17 percent ha ka jylla, katba ka elekshon shiteng samoi ha Selsella ka la poi sha ka 82 percent.
U Chief Electoral Officer (CEO), bah Fredrick Roy Kharkongor u la ong ba ka jingwan ki nongthep vote ka lah ban kiew namar ba dang don ki jaka bym pat ioh jingkhein kiba don na ki jaka ba jngai bym biang ki lad phah khubor.
“Kane kam dei kaba kut. Ngim pat ioh lut ka jingkhein na ki 640 polling stations namar bym biang ki lad phah khubor bad ki jingeh ha ka lynti syngkieng”, la ong u CEO.
U CEO u la ong ba ka Shillong parliamentary ka poi 63.56 percent katba ka Tura Lok Sabha ka long 75.60 percent kiba wan thep vote.
Ha u snem 2014, ki nongthep vote ki poi 68 per cent.
U la ong ba ki don ki jingjia ba sniew ki mashin khamtam kiba iadei bad ka VVPATs. U CEO u la ong ba ka jingduna ha ka ballot units bad ha central units ka long 0.51 per cent katba ha ka VVPATs ka long 1.86 per cent.
U la ong ba na ki 19.14 lak ngut ki nongthep vote, 12. 81 lak ngut ki wan ban thep. Ha Shillong parliamentary constituency ki don 11, 97, 806 ngut katba ha Tura ki don 7, 16, 989.
Haduh mynta ka jingkhein ba la ioh ka long na ki 2,500 polling station na ki 3167 polling station ha ka jylla. Ki don 2053 ki polling stations ha ka Shillong Lok Sabha bad 1114 ha Tura Parliamentary konstitwensi.
Phi don ban ong eiei?