“Ym pat don sorkar, ban tuklar ia ka KHADC”

Shillong,10 Nailur:
U bah Bindo M Lanong, Working Pre sident ka UDP u la ther tyngeh ia kane ka sorkar kaba la ialam da ka seng Congress hapoh ka jing ialam u Dr.Mukul Sangma u myntri rangbah. U bah Bindo u la ong ba kane ka sorkar kaba mynta ka dei ka sorkar kaba leh khyllah ym kum kum kiwei pat ki sorkar kiba la leit noh, “Ngi la mad naduh ka por u Captain Sangma, ym pat sorkar kaba mushlia ia ki kam ka District council, hynrei dei tang kane ka sorkar khyllah u Mukul” ong u bah Bindo haba ia kren bad u Rupang.
Haba kren ia ka jingmushlia ka sorkar ia ki kam synshar khaddar kijba hap hapoh ka jingpeit ka District council u bah Bindo u la ong “Imat kane ka sorkar kam kwah ban ia jai jai lane ban ia shongsuk shongsain, ka la thaw jingkulmar jing jang da kawei bad jingjang da kumwei pat” u la ong. U la ong ba ka KHADC ka dei ka nongpeit ia ka synshar khadar ka riti ka dustur, hynrei mynta pat la wan ban mushlia noh da ka sorkar ia ki kam jong ka, “Ka long kumba leit mushlia mano ia ka khun jongno” bynrap biang u bah Bindo da kaba ong ruh “Don jingmut aiu ban don ka district Council lada wan mushlia noh da ka sorkar ia ki kam jong ka , ka district Council ka dei ka paia kaba khlain tam hynrei ka jingwan mushlia ka sorkar i kumba ka kwah ban pynduh pyndam noh ia ka”.
Utei u nongialam ka UDP u la kyntu ia ka KHADC ba ka dei ban ieng skhem ha ka nongrim jong ka ym ban ailad ia ka sorkar ba kan wan tuklar ia ki kam jong ka bad u la ong ba u kyrshan ruh ia ka jingpyrkhat u CEM ka KHADC u bah Pynshngain N Syiem ban ujor sha Supreme Court. “Nga kyrmen ba lada u CEM un leit sha Supreme Court khlem pep ka Supreme Court kan pynksan beit ia ka District Council”, pynkut u bah Bindo.
U bah Bindo u la pynkynmaw ruh ba dang shen u myntri rangbah ka jylla u la khot ia kren ia ki ha ophis jong u bad ha katei ka jingiakren u la ong ba um kwah ban ia tuklar eiei ia ki kam ka District Council ne ki kam synshar khadar ha ki shnong ki thaw, hynrei dang mynhynnin ka sngi pat u la khot jingialang pynban ia baroh ki seng sain pyrthei ban ia kren Aiñ synshar khadar ha ki shnong, “Kumno ngin leit sha katei ka jingialang haba u la pynkhein hi ia ka jubanlak jong u” pynkut u bah Bindo uba la pynpaw ruh ki jingsngewlyngngoh ba haba baroh ki seng riewlum ki ia tylli bad kim treh leit jingialang pynban ka seng HSPDP ka leit ban kyrshan ia ka sorkar u Dr.Mukul Sangma.