Ym pat dei ban iakren politik, ka mynsiem ka dang pang palat, ong u Conrad

Shillong: U Myntri rangbah ka jylla u Conrad K Sangma u la ong ba kam pat dei ka por ban iakren ia ka kam politik namar ba ka mynsiem ka dang pang palat na ka jingkhlad kyndit u Dr Donkupar Roy.

Haba kren myn hynnin ka sngi sha ki lad pathai khubor, u myntri rangbah ka jylla, u la ong, “Ka jingmong ka dang pang jur (ia ka jingkhlad u nongialam jong ngi Dr Donkupar Roy). Namarkata ngi sngew ba kam pat dei ka por ban iakren ia ka kam Lamphang ha kane ka por. Ai ba ki sngi kin iaid shwa ban kham jem ka jingpang mynsiem bad ngin sa iakren ia kane ka kam politik”, la ong u Conrad.
Kane ka jingkren jong u Conrad ka la long hadien ba la kylli shaphang ka jingthylli ka shuki Lamphang ka ing dorbar thawain hadien ba la khlad kyndit noh u Dr Donkupar Roy, uba dei ruh u president ka UDP kaba la don lang ha kane ka sorkar MDA.