|
Shillong: Katkum ka khubor ba la iohlum, la iathuh ba u President ka AICC u Rahul Gandhi u lah ban nym wan ialap elekshon shuh sha Shillong namar ba u dang bunkam palat sha kiwei ki jaka. Katkum ka khubor ba la iohlum na ka party Congress ha kane ka jylla, la iathuh ba haduh mynta kim pat ioh khubor ban pynthikna ba u Rahul un wan sha kane ka nongbah hynrei la shu pyntip ba u lah ban nym wan namar ba u la bunkam palat. “Ngim pat ioh ka jingpynthikna la un wan ne em haduh mynta bad katkum ka jingsngewthuh jong ngi, u (Rahul) lah ban nym wan shuh namar ba u bunkam palat”, la ong ka khubor ba iajan na ka part Congress ha kane ka jylla. Ha ka jingshisha, ka la don ka jingialap ba u Rahul un wan sha Shillong ha ka 4 tarik mynta u Iaiong ban ialap elekshon ia u kyrtong ka party, u bah Vincent H Pala, bad la thmu ruh ba un kynduh ia ki nongkitkam ka party ha State Convention Centre, Shillong. Wat la ym thikna ba un wan, hynrei na ka liang ka party ka la dep pynkhreh ka jingpan permishon na u Returning Officer, ioh ba u lah ban wan ha katei ka sngi. Kiwei ki lad khubor, ki iathuh ba U Rahul, un don sha Kerala, ha ka 4tarik mynta u bnai, ban thep kyrteng, kum u kyrtong jong ka seng Congress na Wayanad, ha kaba un iakhun na katei ka Constituency ruh ha kane ka kynti, nalor ka Amethi.
|
Phi don ban ong eiei?