“Ym myntoi ban ia trei ryngkat, lada ym don jingshaniah” Ngam bynnud shuki, ngam sngewsih, sngewsih ka Jaitbynriew: Ardent

Shillong,27 Nailar:
Haba kynthoh kylla halor ki khubor kiba la mih na ki jingkren u Deputy CEM uba dei na ka seng UDP u bah Teinwell Dkhar, kiba la pyni ba ki don ki dak or pait ha ka ARPA, u bah Ardent Miller Basaiaw moit, CEM KHADC; u la kyntait ba u trei marwei lane u leh shimet ia ki kam ki jam khlem ka jingtip lang jong ki EM, u la ong ba kum u CEM um don kano kano ka jingbuhrieh ia ki subjek lane ki phang ia ki EM ka UDP kiba la dep ban ia kren ha ka jingialang jong ka EC. Haba kren sha ki nong thohkhubor mynta ka sngi balang ha kamra treikam jong u, u bah Ardent u la pynpaw ba ki jingkynnoh ki pyni ba kam don ka jingshaniah iwei ia iwei hapoh ka kynhun jong ka ARPA , “Lada ym don ka jingshaniah , ym myntoi ban ia trei ryngkat” u la ong.
Shuh shuh u bah Ardent u la ong ba kumba la mih ha ki khubor ka la pynsngewsih ia u, namar ba ki dei ki khubor kiba um shym la khmih lynti kumba la mih ba ka don ka jingor pait ha ka ARPA, hynrei u la long ba ka jingsngewsih jong u kam dei namar ba ka shuki , bad u la ong “Ngam bynnud ia ka shuki, bad ngam sngewsih, hynrei dei ka jingsngewsih ka jaitbynriew”. U la ban biang da kaba ong “Ha ka jingiatreikam khamtam ka jingiatrei synroplang ngam ngeit ba kan ym don ka jingbakla”.
Haba phai sha ki jingkynnoh ka UDP, u CEM ka KHADC u la ong ba ki don ki kam kiba la dep ban pynbeit bad kiba la leh, katba ki don pat ki kam kiba kum u CEM u hap ban shim rai kyrkieh bad katei ka jingleh -u la ong ba kam dei ba u khein poh iano iano, hynrei ka shong katkum ka jingdawa ka kam ban leh.
Haba phai pat sha ki jingkynnoh kaba la kynnoh ba kam don jingpyntip na ka liang u CEM ne u Secretary haba leit sha kino kino ki kam, khamtam ka jingleh jurip ha Iewduh, Basa sohsaw u bah Ardent u la ong ba ki dei ki jingkynnoh kiba khlem nongrim. “Ngam lah ban shu tan jubor iano iano na lynti” u la bynrap biang.
Ha kaba ia dei pat bad ki jingkynnoh ba um shym la khot ia u Deputy CEM ha kamra treikam jong u ban ia donlang ha kine ki sngi ba la dep ba u la khot ia ki ar shnong, u la ong ba ha ka jingshisha ka dei ka kam ban khot ia u EM Elaka ba un donlang, hynrei namaraba um lait u la pyndep ia kaba donkam dalade hi.
U la pynpaw ruh ba lada ka UDP ka sngew ba ka don ka jingbym hun ia kano kano ka kam, khamtam ka jingiakynduh bad ki nong Thyllaw , Mawlongbna u la ong ba ki la dei ban pynsngew ha ki tyndong shkor jong u, ym sha kiwei pat. Halor baroh kitei ki jingkynnoh u CEM u la pynkut da kaba ong “Lehse ki lah ban don da kiwei pat ki jingthmu ba na shalyndet, nga te ngam don”.