Shillong: Ka Khasi Student Union (KSU) ka la kynmaw burom ia ka lyngkhuh sngi iap ba 24 jong u bah Bull Lyngdoh President barim jong ka KSU. Kum ka dak ka jingkynmaw ka KSU mynta ka step ka la leit ban buh syntiew ha u mot ba la tei nam ia utei u nongialam barim. La ialam ia ka kynhun jong ka KSU da u President rangbah jong ka u samla Lambokstarwell Marngar ryngkat kiwei pat ki nongialam jong katei ka seng ha ryngkat ka jingiadonlang na ka ing ka sem jong u bah Bull Lyngdoh. La synran bad pynshngaiñ ia ka KSU da ki nongialam barim jong ka ba kynthup ia u bah Hamlet Dohling u General Secretary barim uba long mynta kum u myntri sorkar jylla.
U bah Hamlet u dei u kongsan ha katei ka sngi buh syntiew ka KSU bad haba kren ha katei ka sngi, u bah Hamlet u la ong ba ka jingkynmaw burom ia u bah Bull, ka dei namar ba u dei u nongialam ba radbah jong ka KSU uba leh beit da ki kam na ka bynta ka jingmyntoi jong ka Ri bad ka jaitbynriew bad u la ong ba ym lah satia ban niewtang ia ki kam ba u bah Bull u la leh kum u nongialam jong ka KSU.
U bah Hamlet u la ong ruh ba kam myntoi ban shu ia heh nia tang ha ki kotkhubor, hynrei kaba kongsan eh ka dei ban leh beit da ki kam bad katei ka dei ka nongrim ba ka KSU ka ieng, “Kam donkam ban shu ia khla ha ki kotkhubor, kam myntoi ban shu ia heh nia ha ki kotkhubor hynrei dei ban leh beit da ki kam kumba u bah Bull u la leh” ong u bah Hamlet Dohling. Haba kdew ia ki ishu kiba bun kiba hap ban ia khun kum u pud u sam u bah Hamlet u la ong ba ka jinglong myntri sorkar jong u ka long ym tang na ka bynta jong u hi shimet, hynrei un iai trei na ka bynta ka jingmyntoi jong ka ri bad ka jaitbynriew. U la pynkynmaw ruh ba ki nongialam jong ka KSU ki leit bad ki wan hynrei ka nongrim jong ka seng kan iai neh.
Ki nngialam ka KSU kiba kynthup ia u General Secretary u samla Donald V Thabah ki la ong ba ka KSU ka ieng beit ha ka nongrim kaba skhem ban iada ia ka ri bad ka jaitbynriew bad u la kdew ruh ia ki ishu kiba u bah Bul Lyngdoh u ia khih kiba ka KSU ka dang buddien haduh mynta kum ka jingpyrshah lynti Rel, Uranium, ka jingwan rung kyrthep ki bar jylla bad kiwei pat ki mat.
Hadien ba la wai ka jingialang ba lyngkot ha u mot sah kynmaw jong u bah Bull Lyngdoh, ka la don sa ka phainal phutbol jong ka KSU kaba la tip kum ka B.N Lyngdoh Memorial kaba la long ha madan Malki, Shillong ha kaba u bah Cheristerfield Thangkhiew General Secretary barim jong ka HNLC u la long kum u wei na ki kongsan ba la shah khot kyrpang.