Shillong, 16 Nailar:
Ka jingbuh jong ka sorkar ia katei ka iew Dielang ha Mawiong kam long phoida eiei ruh em ia ki nongrep, namar ba kam lah ban tuklar halor ki dor jong ki mar rep bad ia ki dor jong ki mar rep la pyniaid da ki kharkaia.
U Bah S.Hynniewta u ba dei u Secretary jong ka Meghalaya State Agriculture Marketing Board u la iathuh ba ki nongrep ki ba wan ban die ia ki mar rep jong ki ha katei ka iew ka dor jong ki ba ki wan ban die ka shong ha ka bor jong u Kharkaia ban buh ia ka dor jong ki mar rep.
“Lada ki nongrep ki shem jingeh ha ka dor jong ki mar rep ba ki wan ban die ha katei ka iew,ka sorkar kam lah ban tuklar ei ei ruh em”, la ong u Bah Hynniewta bad la bynrap ruh ba ka sorkar ka lah ban tuklar tang lada ki nongrep ki shah thok ha ka liang ka thew ka woh ne ha ka liang ka khein ka diah ne lada pynslem ki nongthied ban siew ia ka pisa.
La ong ruh ba lada ki nongrep ki shah thok shah shukor ha kano kano ka liang ka ba iadei bad ki mar rep ki lah ban ai da ka jingujor sha ka Marketing Committee.
La iathuh ruh ba ha katei ka iew Dielang ki nongdie kim donkam ban siew khajna tang ki nongthied ki don kam ban siew khajna sha ka sorkar bad ki dei ban siew tang 1 percent na ka dor jong ki mar rep ba ki thied bad ia kane ka 1 percent ba ioh lum na ki, ka sorkar ka buh na ka bynta ban shna ban pynbha ia katei ka iew.
U bah Hynnniewta u la iathuh ba ka sorkar ka ioh kumba T.50 lak man u snem tang ka bai khajna ba ki ioh lum na kitei ki nongrep ha katei ka iew.
La iathuh ba ki mar rep kiba wan die ha katei ka iew Dielang (regulated market) dei tang lai tylli kiba kongsan kiba kynthup tang u Phan, Synsar bad u Sla Tyrpad.
Dang shen u Rupang u la ioh ban twad jingtip ia ka jinglong jingman jong ka Iew Dielang, la shem ba u Phan ba kumba 15 tyngka shi kilo u la hiar sha ka 10 tyngka shi kilo u ba shi nombor. Katba kiwei ki mar rep u Synsar bad Sla Tyrpad kila kiew dor ha kane ka iew.
Ha ka jingiakren bad uwei kharkaia ba ju thied phan u la iathuh ba don bun jait ki phan bad ki phan ki baheh babha lane uba shi nombor la thied ha ka dor 10 tyngka, uba ar nombor la thied 8 tyngka bad u ba lai nombor pat la thied ha ka dor 6 tyngka shi kilo.
Ia kine ki phan la wanrah na kylleng ki thain ka Ri Khasi kum na Lyngiong, Sohiong, Mylliem, Smit, Laitlyngkot bad kiwei kiwei de ki jaka. Ia kine ki phan la ju shalan sha kylleng ki jaka wat sha shabar jylla ruh kum sha Assam.
Ia u synsar la thied la ki jong ki jong ki dor. U Synsar u ba shi nombor u shongdor haduh 67 tyngka shi kilo bad u ba ar nombor u shongdor haduh 57 tyngka shi kilo. Katkum ka jingiathuh jong une u Marwari la ong ba ki synsar ki ba kham bha la ju kham pynmih na kum ki thain Jirang na ri Ri Bhoi District,Mawsynram, Balat, Synteng, Lawbah na East Khasi Hills bad na Jaintia Hills.
Phi don ban ong eiei?