Ym lah ban shu hukum ia ka jingngeit jong nga, ong ka Kong Ampareen

Shillong, 14 Iaiong:
Ka myntri sorkar jylla ba peit ia ka Information Technology ka Kong Ampareen Lyngdoh ka la pynpaw ia ka jingsngew pyrshah jur ia ka jingpynbna ka sorkar India kum ka Digital Day ha ka 14 tarik Iaiong, kaba dei ka sngi ba kyrpang tam jong ki Khristan ne ka Good Friday.
Haba kren mynta ka sngi, ka Kong Ampareen ka long ba ym don lah ban shu hukum ia ka mon shimet jongno jongno ia kano kano ka jingngeit namar ba ka dei ka kam shimet jong u briew. Ka riti synshar ka ri India ka la ai laitluid ban mane ia kano kano ka jait niam hynrei ka jingpynbna ban rakhe ia ka Digital India ha ka 14 tarik ym lah ban pdiang namar ba ka dei ka sngi ba kyrpang jong ki Khristan. Ka la ong ba ha ka jingshisha, ka jingmut ka sorkar pdeng ka long kaba bha hynrei ka kam ba leh kam long kaba bha.
Ha kawei ka liang, u nongialam ka BJP u Bah JA Lyngdoh, ba khot sin Bah Dip u la ong ba ka jingsngew jong ki paidbah Khristan ka ktah ban rakhe ia ka Digital Day ha ka sngi Good Friday. U la ong ba ka sorkar pdeng kam shym la thmu ban leh khnang ha ka sngi Good Friday hynrei ka shu jia ryngkhat namar ba ka Good Friday kam ju neh ha kajuh ka sngi na ka snem sha ka snem. U la ong ba ka sorkar pdeng ka la rakhe ia ka Digital India kum shi bynta ban kynmaw kyrpang ia u kpa ka Riti Synshar ka ri India u Dr Ambedkar.