Ym lah ban mane blei ha krem Mawjymbuin, ong ka Mawsynram

Shillong:Ka Dorbar Shnong Mawsynram ka la ïeng beit ha ka nongrim ba ym lah ban mane blei hapoh ka krem Mawjymbuiñ, hynrei katei ka krem yn shah ban rung ban mih tang na ka bynta kiba leit jngohkai.

Hynne ka Sngi Thohdieng 3 tarik Kyllalyngkot, ka Deputy Commissioner jong ka East Khasi Hills ka la lum ïa ka committee katkum ka jingbthah ka ïing Kashari Meghalaya High Court, na ka bynta ban pynbeit ïa ka kam ba ïadei bad ka krem Mawjymbuiñ.
Haba kren hadien ka jingïalang u Bah Hiamdor Rapsang u la iathuh ba ka dorbar shnong ka la pynpaw ba k khang satia ïa ki briew ban leit jngohkai ïa ka krem Mawjymbuiñ, hynrei ka ym shah pat ban pynlong jaka mane blei.

Ha kane ka jingïalang la wan lang ruh da ka kynhun ki hindu na Assam, ka Kutumba Surakshya Parishad.
Na ka liang ka dorbar shnong ka la pynpaw ka jingbym sngewtynnat ia ka jingwan tuklar katei ka kynhun KSP, hynrei hadien ba la kren pynsngewthuh da ka Deputy Commissioner ki la mynjur ban shong ha ka jingïalang.