Shillong:U Ma Vincent Pala, President ka Meghalaya Pradesh Congress Committee (MPCC), u la ong ba na ka liang jong u hi, un ym kwah ba ha u snem 2023 ka Congress kan leit ban iasoh bad kano kano ka party ba kan wanh ha ka bor namar ba u kwah ba ka party kan ia khun tyngeh ha kane ka election.
Haba ia kren bad ki lad pathai khubor, u la ong “Ka rai ban pyniasoh ia ka Congress bad kiwei ki party ban wan ha ka bor ha u snem 2023 kan long ka ba kyrkieh eh ban shim mynta namar ba na ka liang ka High Command ka khlem pat ai kano kano ka rai ba ngin lah ban pyniasoh bad kiwei ki party”.
“Kat kum ka jingsngewthuh jong nga hi shimet ka long ba ngam kwah ba kan don kata ka jingpyniasoh bad kiwei kiwei ki party ban thaw sorkar namar ba nga la ju iohi ba ha West Bengal, ha Tamil Nadu bad ha UP kat ba ngi leit ban pyniasoh bad kiwei ki party ka party jong ngi ka dang rit shuh shuh”u la ong.
U la bynrap shuh shuh “Ha ka jylla hi, nga tharai la ngin jop ne ngin rem ruh ngi dei ban ia khun tyngeh bad ia kane ngin sa peit hadien ka election ngin sa peit ia ka ei ka ban sa mih ha ka jylla Meghalaya hi ngam tharai ba ka history kan long kumjuh”.
U bah Pala u la ong ruh “Ka ju don ka jing tharai man ka por wat haduh mynta ka kynti ruh ba ki ong ba ka Congress kan sa ioh zero ha kane ka election, hynrei haba ki leit sha tynrai ngin shem ba bun hi ki briew ki dang mon ban kyrshan ia ka Congress”.
“Ki nongialam ki lah ban wan bad ban leit, hynrei kan eh ia ki ban rah ia ki hajar ngut ki nongkyrshan jong ki kum ha Garo Hills hi ki nongialam ki la leit pyniasoh ia lade bad ka TMC, hynrei ym don tang u wei ruh u President bad u Secretary ka Block Congress u ba la leit ban pyniasoh lang ia lade”la ong u President ka MPCC.
“Wat ha khasi bad Jaintia ruh ki lah ban kam ba ki la khylliap lama ia ka Congress, hynrei ki nongkyrshan kim shem la leit bud ia ki, ki nongialam ki lah ban shah pynbiej da ka ba suk hynrei kan long ka ba eh ban pynbiej bad ban tan ia ki nongthep vote”la bynrap shuh shuh u President.
U bah Vincent u la ong ba u don ka jingkyrmen skhem ba kane kan wan rah ia ka jingjop ia ka party bad ruh ba ki paidbah hi ki la ngiah ia ka party NPP, ha kaba baroh hi ki tip ia ka daw bad mynta hi ki paidbah kin phai khmat sha ka Congress bad ka kamram jong ka Congress mynta ka long tang ban ai ia ki paidbah ia ki kyrtong kiba bha.
Ng te naduh ba nga ioh thep vote nyngkong eh ha party congress ng shait thep nmr ng shaniah ha ka congress bd nga kyrmen skhem ba ka congress kan jop ha u snem 2023….