Ym kren shai U Mukul ba tyrwa ksiang u Bah Dorphang

Shillong, 16 Lber:
Haba kynthoh halor ka jingtyrwa ban long ksiang jong u chairman barim ka HNLC uba dei u MLA ka Mawhati mynta u Bah Julius K Dorphang, u Myntri Rangbah ka jylla u la ong ba ia kane ka kam dang iakren bad ka sorkar pdeng namar ba ka seng HNLC ka dei ka seng ba la niew beain.
“Ngi hap ban iarai lang bad ka sorkar pdeng namar ba ka seng HNLC ka dei ka seng ba la khein beain bad ngi dang ap ia ka jubab jongka halor kane”, la ong u Myntri Rangbah mynta ka sngi sha ki nongthoh khubor.
U Dr Sangma u la ong ba ka long kaba shisha ba ba ka seng HNLC ka la pynpaw ba ka kwah ban iakren bad ka sorkar.
Hynrei u la ong, ka sorkar ka kren shai ba ka HNLC ka dei ban sangeh ban rah suloi bad kiwei ki kam beain lada ka kwah ban iakren bad ka sorkar.
“Ki dei ban pyni ba ki sangeh ban leh ia ki kam pyrshah ri”, la ong u Dr Sangma.
U la ong ba watla ka sorkar ka la iai kyntu ba kan kiar na ki kam beain hynrei ka HNLC ka iai bteng ban leh ia ki kam beain bad kane ka la wanrah ia ka dur kaba sniew ia ka jingthmu ban khot sha ka miej iakren.