Ym kit khlieh ki shnong lada jia ei ei, ong ki SKRS

Shillong, 3 Risaw:
Ka Synjuk Ki Rangbah Shnong (SKRS) ka la maham ia ka sorkar ba kan ym kit khlieh lada jia ei ei hapdeng ka jingiapyni bor hapdeng ka sorkar bad ki sengbhalang kiba pynlong ia ki jingiakhih ban dawa ia ka Inner Line Permit(ILP) ha ka jylla.
Ha ka dorkhas ba la aiti ha u Myntri Rangbah u Mukul Sangma ki rangbah shnong ki la ong ba ka sorkar ka dei ban wad ia ki lad ki lynti ban pynjem ia kane ka jingiakhih ioh kan ialam pynban sha kaba kham sniew shuh shuh.
Ki la ong ba ka dorkar shnong kan ym iatreilang bad ka sorkar ne kan kit khlieh lada jia ei ei ba mih ka huri hura namar ka jingiapyni bor hapdeng ka sorkar bad ki sengbhalang.
Ki rangbah shnong ki la ong ba kane ka jingmih ka kynrum kynram, dei namar ka jingbym ler ka sorkar ban shim khia bad ban pynjem ia ki nongiakhih.