Shillong:U nongialam jong ka All Indian Trinamool Congress (AITC), u Derek O Brien, ula ong ba kiwei ki parti kim ju rah ia ki mat kiba iadei bad ka jylla Meghalaya ha ïing dorbar thawaiñ (parliament), hynrei ka TMC ka la pyrshang ban leh kloi katba lah ban kren ia ki mat jong kane ka jylla rilum kaba itynnad.
Haba iakren bad ki nongthoh khubor ha Windermere Resort, Shillong, u president jong ka Meghalaya Trinamool Congress, bah Charles Pyngrope ha ka jing don ryngkatlang u nongialam jong ka parti AITC ha Rajya Sabha, u Derek O Brien, ki la pynrem ia ka sorkar synroplang MDA namar kiba bun ki jingbym biang ki rukom pyniaid kum ka jingai khaw, ka jingthew ia ki bording elektrik (smart-meter), ka jingthied kali pulit bad ka jingkhyllem noh jong u dome jong ka ïing dorbar thawaiñ ba thymmai jong ka jylla.
Kine ki nongialam ki la pyni ruh ia ka jingkren jong ki dkhot jong ka ha ïingdorbar thawaiñ ha kaba iadei bad katto katne ki mat jong ka jylla Meghalaya, kum ka jingpynrung noh ia ka ktien Khasi bad Garo ha ka khyrnit ba phra jong ka riti synshar jong ka ri, ka jingshah thombor jong ki Khristan ha kylleng jong ka ri, ki bam sap bam pong ha ka jylla, ka jingkhaïi tuh ia u dewiong bad ka jingduna jong ka roi ka par ha ka jylla Meghalaya bad ka thaiñ shatei lammihngi hi baroh kawei.
Haba iadei bad ka jingdkoh jong ka rukom pyntreikam ia ki ain ha ka jylla, u president jong ka parti Meghalaya Trinamool Congress ula ong ba ka jingphah pahara ia ki da ka kynhhun shipai jong ka sorkar pdeng ban tehlakam ia ka jingshalan tuh ia u dewiong ka dei namar ba ka sorkar jylla kam shym la leh ia ki kam ba ki dei ban leh. Kumta ka ïingbishar (high court) ka la bthah ban phah pahara noh da ki kynhhun pahara jong ka sorkar pdeng.
U MP jong ka AITC ula iathuh haba iadei bad ka jingshim bynta jong ki MP ka AITC ban rah ia ki mat kiba iadei bad ka jylla Meghalaya, u da ong, “ngi la wanrah man ki mat kiba iadei bad ka jylla Meghalaya ha ïingdorbar parliament bad ula buh jingkylli ruh kiei ki kam ba kiwei pat ki national parti ki la leh ha ba iadei bad ki mat ba ktah ia ka jylla Meghalaya? Pyni ia ki kam ba kiwei ki seng saiñ pyrthei ki la kren ha ïing dorbar thawain parliament kaba iadei bad ka jylla Meghalaya. Ngin bteng ban rah ia kum kine ki mat ba ktah ia ka jylla Meghalaya”.
Kum ban shu pynkynmaw, u MP jong ka AITC ha Rajya Sabha, u Derek O Brien ha ka 7 tarik mynta u bnai ula rah ia bun tylli ki mat kiba ktah ia ka jylla Meghalaya ha kaba iadei bad ka jingbym shai ka jingthied jong ka sorkar ia ki smart meter, ka jingbamsap ban thied ia ki kali pulit bad ka jingkhyllem noh jong u dome jong ka ïingdorbar thawaiñ ba thymmai jong ka jylla Meghalaya kaba la pyntrei da kawei ka kompeni ba la tip kyrteng kum ka Uttar Pradesh Nirman Nigam limited bad ha kajuh ka sngi ula kren ruh ia ka jingshah thombor jong ki Khristan.
Katba ha ka 8 tarik Rymphang, sa uwei pat u MP jong ka AITC, u Jawahar Sircar ula kyntu ba dei ban kynthup noh ia ka ktien Khasi bad Garo ha ka khyrnit ba phra jong ka riti synshar jong ka ri. Uwei pat u MP ka AITC, u Abir Ranjan Biswas ula rah ia ki mat haba iadei bad ka jingjur jong ka jingshalan tuh ia u dewiong ha ka jylla bad dawa ruh ba ki arngut ki nongtrei mon sngewbha na jylla Meghalaya kiba la shah thombor ha ki katto katne snem mynshwa ki dei ban ioh ia ka jingbishar kaba hok.
Haoid Ka ba dei Kata kiwei ki party ngam juh sngew koit ba kin kren shaphang Jong ngi ki khasi rit paid khamtam ki jingeh Jong Ka jylla Meghalaya tang Ka TMC nga lh dep iohi lyngba ki YouTube ha Kaba ki MP Jong Ka TMC na West Bengal ki kren ia Ka jingshisha kiba ia dei bad Ka jylla Jong ngi.kat ba ki MP na Meghalaya Kim kyrshan ia Kaei Kaba ki MP na west Bengal ki kren shaphang Ki mat ki Jura ha Kaba iadei bad Ka jylla Meghalaya.nga na umroi constituency full support TMC.