“Ym ithuh Khasi shuh ia ki kynthei ba ioh lok khyllah jait”

Shillong, 19 Naitung:
Ka Dorbar shnong Nongsder kaba hap hapoh Ri-Bhoi district ka la pynmih ia ka rai ba ka Dorbar shnong kan nym ithuh Khasi shuh ia ki kynthei Khasi kiba ioh lok khyllah jait.
Ia kane ka rai jong ka Dorbar la rai ha ka Dorbar ba long mynshem snem ha u bnai Lber, la ong u Rangbah Shnong u Bah Welcome Shangpliang.
Ha ka Dorbar hynne ka sngi ha madan Nong sder u Rang bah shnong u la iathuh ba ka Dorbar ka la rai ba kan nym ailad shuh ia ki kynthei Khasi ban ia shongkha bad ki khyllah jait lada ki iashong kha bad ki khyllah jait kin duh noh ia ka jinglong Khasi. U la ong ka daw ka long ba kane ka jingshongkha khleh ka long ka jingma ia ka jaitbynriew na ka jingioh khlieh ki briew nabar da ka shongkha shongman ia ki kynthei Khasi.
Katkum ka jingong u Rangbah Shnong, ka jingjia ha Nongsder kaba la ialam shaduh ka jingshah kem jong ki san ngut ki rangbah ka lah ban dei na kane ka daw namar ba don ki kynthei kiba bishni imat ia kane ka rai namar ba kim iohlad shuh.
U la ong ba ha ka shnong Nongsder, ka Block-IV ka dei kawei kaba bun tam ki briew basah bym dei Khasi bad ha katei ka Dong, la mih ruh bun ki kam bym man kiba long pyrshah ia ka imlang sahlang.
“Ngi la pyrkhing bha ia kane bad kito kiba leh ia ki kam sniew, ki bishni namar ba kim iohlad shuh naduh ba ka shnong ka pyrkhing bha”, u la ong.
Ka shnong Nongsder, ka don haduh 6 tylli ki Dong bad ka dei ka shnong kaba heh bad kaba don ki jingiashong khleh.