Ym ithuh ka Seng Khasi Kmie, ia ka Seng Hima Mawsynram

Shillong, 20 Naitung:
Hadien ba la mih ha ki lad pathai khubor halor ki jingjia bapher bapher ha ki thaiñ Hima Mawsynram kaba kdew sha ka Seng Khasi, ka Seng Khasi (Kmie) ka la khot ïa ka jingïalang jong ki tnat bad ki nongïalam ka Seng Khasi kiba hap hapoh u pud u sam ka Hima Mawsynram ban ïoh jingshai halor kine ki phang.
Ha ka jingpynlait khubor, u General secretary ka Seng Khasi Kmie u Bah Arwan S Tariang u la ong ba ka Seng Khasi Kmie ka la pynpaw ba kam shim la tip ba la seng ïa ka Seng Khasi Hima Mawsynram bad hadien ba la tai sani la shem ka Seng Khasi Hima Mawsynram, kam shim la kynjoh ktien ïa kino kino ki tnat Seng Khasi kiba hap hapoh kane ka hima bad ruh, ïaka Seng Khasi (Kmie), ban seng ïa kane ka Seng Khasi Hima Mawsynram.
Halor kane la don ka jingïatai ba sani bha bad la rai ba kam don kano kano ka jingithuh satia ïa kata ka Seng Khasi Hima Mawsynram bad la hukum ïa ka Seng Khasi Hima Mawsynram ban weng noh ïa ka kyntien ‘Seng Khasi’ na ka registration jong ka.
Ka Seng Khasi (Kmie) bad ki tnat Seng Khasi ba hap hapoh ka Hima Mawsynram ki kwah ban pyntip ruh ba kim don bynta ei ei ruh bad ki la kyntait ïa ka jingïadon kti ha ki jingjia kumba la mih lyngba ki lad pathai khubor, la ong u Bah Tariang.
Ia kane ka rai ka Seng Khasi Kmie(Mawkhar) la shim ha ka jingialang ba la khot ia baroh ki tnat Seng kiba don ha ka thain Mawsynram na ka bynta ban iapynbeit hadien ba la mih ka kynrum kynram haduh ban shah khang lad ban pynlong ia ka jingduwai ha Krem Mawjymbuin, ha Mawsynram.
Ha ka jingiakren bad u President ka Seng Khasi Seng Kmie u Bah Bantei Rumnong hynne ka sngi, u la iathuh ba ka jingmih ka kynrum kynram ka la long ka jingjah burom ia ka Seng.
“Ha ka jingialang ngi la shim ia ki katto katne ki rai”, la ong u Bah Rumnong bad bynrap, ba ia mynta ngin pat lah ban pynlait paidbah ia kine ki rai.
Lah ban kdew ba dang shen, ka jingthmu ka Seng Khasi Hima Mawsynram ba la ialam da u President jongka , u Bah Tyllilang Myrthong ban pynlong ia ka jingknia ha Krem Mawjymbuin ka la pulom noh hadien ba ka la shah khang lad ha ka bor shnong ka Mawsynram halor ka jingkam ba kam don kano kano ka jingiakren bad pyntip sha ka bor shnong halor kane ka jingthmu.