Ym iahap u Dr Donkupar ia ka jingkren u Dr Mukul

Shillong, 06 Nohprah:
U President ka UDP u la ong ba imat ka jingpynduh ka sorkar pdeng ia ki lut pisa 500 bad 1000 ka don shisha imat ka jingktah ia ki Congress khamtam ia ki myntri bad ki MLA. Haba kynthoh ia ka jingkren pyrshah jong u Myntri Rangbah u Dr Mukul Sangma ia ka jingpynduh ia kine ki pisa kot, u Dr Don, u la ong, “Imat ka don shisha ka jingktah ia ki Congresss”,.
“Kano kano kaba leh na ka bynta ka jingbha, ka don beit ka jingktah shipor hynrei kan wanrah ia ka jingbha kaba slem ia ki paidbah”, la ong u Dr Donkupar.
“Nga iaroh ia ka sienjam ba leh da u Myntri rangbahduh ka ri ban pynduh ia ka pisa 500 bad 1000, namar haba phi kwah ban shna ia ka iing kaba thymmai, donkam ban khynra shwa ia kiba rim”, la ong u president ka UDP. U la kubur ba ka jingthmu ban pynduh ia kine ki 1000 bad 500 ban khang lad ia ka pisa thok, pisa tuh bad ki kam pyntriem.
Katkum ka jingong u Dr Don, ym lah ban len ba kane ka jingpynduh kynsan, kan ktah ia ka ioh ka kot hynrei kan long tang shi por. Hynnin ka sngi haba kren sha ki lad pathai khubor, u Dr Mukul u la ong, “Ka jingpynduh kot 500 bad 1000 ka dei ka jingbym pat tbit, bad kan pynkharoi shuh shuh ia ka bamsap ha ka ri bad ym lah ban khang lad ia ka pisa thok”,.
U la ong ba ka jingpynduh ia kine ki lut pisa, ka long kum ka thma hi kumjuh kaba la wanrah pynban ka jingiap briew ha ka ri. “Ka long kumba ialeh thma pynban ha kaba ka la wanrah ia ka jingduh ki mynsiem briew hynrei u Myntri Rangbahduh ka ri pat um lah ban pynmih tang ia ka ktien pan map ruh ne ban ong ‘map’ “,u la ong.
“Ha kine ki sngi, kawei ka longkmie ha Tura ka la ioh pdiang ia ka pisa thok ba thymmai haduh lai tylli”, la ong u Dr Mukul bad bynrap, ka jingthmu ban khang lad ia ki pisa kam nym lah satia”.
Ha kawei ka liang, u la ong ba ka jingpynkiew ka sorkar ia ka Contingency Fund ka lah ban ktah ia ka mang tyngka jong ki tnad khamtam haba ka sorkar kam don pisa. “Ka sorkar ka kam ba ka pahuh pisa hynrei haba peit ia ki kam, kam don pisa. Ngim tip haduh katno ka don pisa namar ba ngim iohi ia ka pla pisa ka sorkar”, la ong u President ka UDP.