Ym iahap ka HSPDP ba ai dulir pud ka sorkar MUA sha Assam

Shillong: Ka seng Hills State People’s Democratic Party (HSPDP) ka la buh jingkylli ia ka jingai dulir ka sorkar barim ka Meghalaya United Allowance (MUA) ba ialam ka Congress sha ka Assam halor ka jingkam ia ki jaka ba iakajia.

                Haba kren myn hynnin ka sngi, u President ka seng u bah KP Pangniang ula ong ba kam dei ki ar tylli ki lah ban ia ai ia ki dulir lada ka Committee on Inter-State Boundary ban ia pule ia ka jingiaknieh jaka.

                “Ka la don ka Committee ka ban eksamin ia ki dulir da baroh ki jylla Assam bad Meghalaya,”la ong u bah Pangniang.
U la kam ba ki 12 tylli kiba iakajia kim don ha ka map ka Meghalaya 1976 bad  ka iapher na ka map 2008.
U bah Pangniang u la ong ba ka map ka Meghalaya kaba shisha ka dei jong u snem  1976 bad dei ban shim ia kane, hynrei kan long kumba hikai bakla ia ki khynnah skul.

U la ong ba ki jaka jongki shnong ha Langpih, Block I bad Block II kim shym la paw shuh ha ka map 2008.
U la ong ba katba ka Meghalaya ka la aiti ia ki dulir khappud, hynrei ka Assam pat kam shym la ai eiei sha ka Meghalaya.
U bah Pangniang u la ai jingmut ia u CEM ka KHADC ban thaw biang ia ka Committee on Inter-State Boundary ban pyndep ia ka map bad kiwei ki kam ba iadei bad ka kam khappud.
Ka sorkar jylla bad ka KHADC ki dei ban long shjai halor u pud u sam jong ki 12 tylli ki jaka ba iaknieh kaba don kumba  2700 sq km.
Katkum ka jingong u bah Pangniang, ka KHADC ka dei ban pyndep ia ka kaiphod da kaba lum ia ki sakhi satar na ki Elaka, Hima khamtam kito kiba shah skud ha ka Assam ha kito ki jaka ba iakajia.
U la ong ba naduh u snem 1975-76, la don 21 sien ki jingiakren hapdeng ka sorkar Meghalaya bad ka Assam hynrei ka jingbym don ka kaiphod ka la buh jingeh ia ka Meghalaya.
U bah Pangniang ula ong ba ka HSPDP kan kynduh ia u Myntri rangbah u  Conrad Sangma shwa ba un leit iakynduh ia u Myntri Rangbah ka Assam halor ki kam khappud.
Ha kajuh ka por, u la pynrem jur ia ka jingwan shna surok ka Assam sha Meghalaya kumba la jia ha New Balakhawa. “Balei ka Assam ka wan leh smat sha u pud u sam ka Meghalaya. Dei ban kyntait ia kane kam ka Assam bad dei ban pynsangeh shi syndon”, la ong u bah Pangniang bad bynrap, ba kane ka dei ka buit ka Assam ban wan skud ia ki jaka ka Meghalaya.