Ym ïahab ka Myntri, ïa ka jingdawa nongbah tlang, ka ACHIK

Shillong:Ka myntri bad nongaiktien ka Sorkar Jylla, ka kong Ampareen Lyngdoh ha ka sngi ba-ar, ka la pynpaw ba ka jingdawa Winter Capital jong ka A’chik Conscious Holis tically Integrated Krima (AC HIK) kaba dang ïashah jingit mynta ha Tura, ka dei ka bym ïahab satia ban mynjur, namar ka nong bah hi ka dei ka Shil long.

“Ha nga shimet nga sngew ba ym dei ban sngap ïa kum kine ki jingdawa. Lada mih ki jingdawa wanrah ïa ka Winter Capital shatei, wanrah ïa ka Spring Capital hangne, wanrah ïa ka Summer Capital sha kiwei ki jaka, baroh kiei kiei kin sa ïaid bakla lut.”

Ka ong, “Ka Meghalaya ka dei ka Jylla kaba don ïa ki District bapher bapher, bad lada man ki District ki dawa ban ai ïa ngi kata, ai ïa ngi kata, kan long kaba eh ïa ka Sorkar ban pynïaid ïa ki kam ki jam.”

Ka Kong Ampareen, ka la kdew ba ka jingpynkha jong ka Sorkar ïa ki C&RD Block ha kylleng ki jaka ka dei kawei na ki sienjam ban rah shajan ïa ka jingshakri ka Sorkar sha u paidbah.
Ka la pyntip ba u Myntri Rangbah, un sa ïakynduh ïa ka ACHIK ha ka 24 tarik Naitung, ha ka jingleit jong u sha Ri-lum Garo.