Ym ia sngewthuh ki nongtrei 108, ka kompeni bad ka sorkar ha ka jingialang

Shillong: Ka jingialang kaba nyngkong ka Committee kaba la thung ka sorkar ban eksamin ia ki mat jingdawa ki nongtrei ka EMRI 108, ka sorkar bad ka Kompeni kam pat poi sha kaba iasngewthuh jingmut ne iahun.

Ka jingialang ka long hynnin ka sngi ha kaba ia kane ka Committee ba la khlieh da u secretary ka tnad ka koit ka khiah u Pravin Bakshi la pyllong ha ophis ka Directorate of Health and Services, Shillong.
Ha kane ka jingialang, ki nongmihkhmat na ka Meghalaya EMRI Workers Union (MEMRIWU) kila pynpaw ba kim sngew hun satia namar ba ia ki mat jingdawa jongki, bun ba la shah kyntait.
Haba kren sha ki lad pathai khubor, u president ka MEMRIWU u bah Roipar Kharraswai u la iathuh ba ha kane ka jingialang la iakren ia ki saw tylli ki mat ba kynthup ia ka jingpynbiang nongtrei, ka tulop, ka shuti bad ka jingpynkynriah kam.
U president ka seng u bah Roipar Kharraswai haba kren sha ki nongthoh khubor, u la ong ba la iakren 4 tylli ki mat ba iadei ban pynbiang ne thung briew ha ki kali kit nongpang kaban long 3 kawei ka ambulance bad uwei uba pynap ne reserve ha man ka district bad 7 tylli kali kiba shakri tang 12 kynta, dei ban pynbdap briew ban shakri beit 24 kynta.
“La iakren ia ka tulop bad ka jingkwah jong ngi ka long ba dei ban siew katkum ka kam ba trei hynrei na ka liang ka sorkar kam iahap halor kane bad ngi la dawa noh ba dei ban pynkiew ar shah ka jingsiew bad 30 percent CTC Annual increment”, la ong u bah Roipar.
U la ong ba bor pyniaid ka la kam ba kam hap ha ain Labour ne Establishment Act ne ha kano ka ain bad na ka liang ka seng ka kwah ba ka bor pyniaid kin ai da ka jingthoh ba kim hap ha ki ain bad ki hap ha ka ain bad ki dei ban ia da ka jingthoh khnang ba kin nang ban leh ia kaba donkam.
U bah Roipar u la ong ba ka bor pyniaid ka dei ban siew ia ka 8 kynta bad 4 kynta ka bai trei tam ne over time katkum ka hok jong kaba ki dei ban ioh namar ba naduh ba sdang haduh mynta ym ju ioh ia ka jingsiew trei palat por ne overtime.
U la iathuh ba ia ka shuti kumba long mynshwa ki don kiba khlem ioh shuti bad la iakren ka bor pyniaid ba kin pynbiang ia ki shuti bad kawei kaba sngewsih ka dei ka encash leave naduh 2015 haduh mynta kim ai pisa shuh bad ka seng ka dawa ban siew ia kane ka encashment leave naduh 2015.
U bah Roipar u la iathuh ba kawei dei jingkynriah kam ha kaba la dawa ba ha jaka Khasi, dei ban buh da ki Khasi bad sha Garo dei ban buh da ki Garo khnang ban lait na kano kano ka jingeh ha ka ktien ka thylliej, ka iaid ka ieng namar ba bunsien ka wanrah ka jingeh namar bym ithuh ne sngewthuh bha ban iakren.
“Hynrei halor kane na ka liang ka sorkar kam pdiang ia kane ka jingdawa jongki”, u la ong.
Ha kajuh ka por, ki la ong ba kin nym kynran dien ia ka jingdawa bad hadien ka ar bnai ba kut ka por ban pyndep ka committee kin sa pyrkhat kaei kaba mih.