Ym i ler ka sorkar, ia ka jingbun paid ki Sengbhalang? r“Tdot” khlem jubab ia ka jingiakhih shong kyllain mongor

Shillong, 13 Jymmang:
Ka la don ka jing khmih lynti na ki paidbah ba mynta ka sngi la kumno kumno lada khyn diat eh kumba 1500 ne 2000 ngut ki dkhot seng bhalang kin poi sha ka jingiashong kyllain mon gor kaba la long mynta ka sngi ha parking Lot hajan Additional Secretariat, kaba long ruh ka jingia khih ba nyngkong eh ki 13 sengbhalang hadien ka jingshah kem u President Rangbah ka KSU u samla Daniel Khyriem.
Hynrei ka la pyn lyngngoh ia kiba bun bah, namar ba ha katei ka jingiakhih jong ki 13 sengbhalang ki la don pynban tang kumba 300 ngut tam bad hapoh 400 ngut ki dkhot kiba la wan ia shim bynta ha ka jing iashong kyllain mongor. Ki tyllong khubor ki la iathuh ba ka sorkar bad ki bor pyniaid distrik mynta ka sngi ki la pynkhreh ki bor pahara kiba khlain na bynta katei ka jingiakhih, naba ki la shim ba kan long ka jingiakhih kaba heh kaba la kumno kumno yn ym duna ia ka 2000 ngut ki dkhot sengbhalang ki ban wan, bad ki tyllong khubor ki la iathuh ba ka sorkar ka antad jingkhein ba kin don kumba 5000 ngut eiei.
Naduh ba sdang ka jingiashong kyllain mongor kaba la sdang naduh ka por 10 baje haduh ka por 4 baje janmiet ka sorkar kam shym la jubab eiei ia ki Sengbhalang, lymne kam shym la khot ia kren ia ki ban iakren lada ym lah ban pyntreikam ruh ia ka jingdawa jong ki, kaba la pynlong ia ki ban leit phai noh bad ban dang hap ban ia shong pyrkhat biang ban pynbna sa kiwei pat ki jingiakhih.
Halor katei ka jingbym khot iakren lymne jubab ka sorkar ia ki 13 sengbhalang kiba la pynlong jingiakhih mynta ka sngi, bun bah ki la sah lyngngoh bad ki jingkylli ki la tap lep ha ka jingmut jingpyrkhat jong ki, ioh ba lehse katei ka jingbym patiaw ka sorkar ka dei pynban ba kam i ler ia ka jingbun paid jong ki 13 sengbhalang kiba don tang hapoh ka 400 ngut kiba la wan sha katei ka jingiakhih.
Ka la pynlyngngoh ruh ia kiba bun balang ha katei ka jingiakhih jong ki 13 sengbhalang kaba la long mynta ka sngi naba haduh 13 sengbhalang ki la pynlong jingiakhih bad tang kumba hapoh 400 ngut kiba la wan ban ia shim bynta pynban la iohi ba kiba bun ki dkhot sengbhalang kiba la wan ki dei ki dkhot ka KSU, ha kaba la sakhi ba ha katei ka jingiakhih bad ka jingiaid lynti na IGP sha Motphran ki la ieng tang ki lama ka KSU bad ka jingpyrta, ‘Maitshphrang Khlur ka ri’ kaba dei ka motto jong ka KSU.