Ym hun ka RDA tang ha ka 6th schedule, kwah da ka ILP

Shillong:Ka jingialang ka Regional Parties Alliance (RPA) mynta ka sngi ba kynthup ia ka UDP bad HSPDP kala shim ia 3 tylli ki rai ban iada ia ka jingwan rung ki briew nabar khamtam na ka jingpynlong ain ka sorkar BJP ia ka Citizenship Amendment Bill (CAB).

Haba kren sha ki lad pathai khubor hadien ba la wai ka jingialang, u working president ka UDP u bah Paul Lyngdoh, ula iathuh ba kine ki rai ki long ban tynruh ia u Lat ka jylla ban pynsted ban soi noh ia ka ordinance ka Meghalaya Residents Safety and Security Act 2016 bad kawei pat ka rai ka long ban dawa na ka sorkar pdeng ban pynlait pura ia ka jylla Meghalaya na ka tyngam ka Citizenship Amendment Bill namar ba ka jingpyllait tang ia ki jaka ba hap ha ki sixth schedule kam biang satia.

Kawei pat ka rai ka long ban dawa na ka sorkar pdeng lyngba ka sorkar jylla ban pyntreikam da ka Inner line Permit (ILP) ha ka jylla.
“Ngi la shim ia ka rai ba ngin leit synran lang lashai sha Delhi bad u myntri rangbah ban kynduh ia u myntri kam pohiing ka ri u Amit Shah, ban bthah ia u Lat ban ai noh ka jingmynjur ia ka Ordinance ka MRSSA”, la ong u bah Paul.
Ula ong shuh, “Yn dawa ruh na ka sorkar pdeng ban pynlait pura ia ka jylla Meghalaya na ka CAB namar kam pat biang tang ha ki sixth schedule”.
Ha kajuh ka por ula ong ba ban kham pynskhem ia ka jingiada ia ki trai shnong ka jyll, “Yn dawa na ka sorkar pdeng ba kan pyntreikam noh da ka ILP ha ka jylla Meghalaya kumba ka ai ha Manipur”.
Ha kawei ka liang, halor ka jingkyntait ka Congress ia ka ILP, u bah Paul ula ong, “Ha u snem 2013, ka Committee ba la khleh da u symbud myntri rangbah bah Bindo M.Lanong ha katei ka snem, kala phah ia ka jingai jingmut sha ka sorkar ba ka ILP ka dei ka atiar kaba biang ban tehlakam ia ka jingwan rung ki briew nabar hynrei ka sorkar u Dr Mukul Sangma ka Congress, kala kyntait ia kane”.
Ula bynrap, “ ha ka snem 2016, ngi la tur sha ka jaka shong u Lamphang ka ing dorbar ban dawa ban iakren ia ka ILP hynrei ha katei ka por, ka Congress kam shym la pdiang satia”.
Kane ka jingkren u bah Paul ka long hadien ba la pan ia ka jingsngew jongu halor ka jingkren u Dr Mukul ba ka ILP ne ka sixth schedule kim lah ban iada ia ka jingwan rung ki briew nabar.