Ym hun ka kmie ka kong Victoria ia ka Post Mortem

Shillong, 04 Nailar:
Ka kmie jong ka Kong Victoria Kharko ngor ka Kong Berlin Kharkongor ka la pynpaw ba kam hun ia ka kaiphod ka post mortem ia ka khun jongka.
Ka Kong Kharkong ka la suba jur ba ka la don eiei ka jingleh dusmon ia ka khun jongka shwa ba kan shah pyniap ha Guwa hati ha u bnai ba la dep bad katkum ka jingong ki pulit ka pyniap hi ha painkhana ha Police Station ha Dispur.
Ka Kong Belin kaba ioh pdiang ia ka kaiphod jong ka post mortem ha ka taiew ba la dep, ka la ong ba kam hun satia.  “Nga suba jur ba ka khun jong nga ka la shah pyniap hynrei balei kan don ka dak mong ha khlieh jong ka”, ka la ong ka Kong Berlin.
“Ngin leh ia kaei kaba nga lah ban leh ban pynthikna ba ka hok kan ieng”, ka la ong.
Ka President ka CSWO kaba buddien ia kane ka kam, ka la ong ba ka Post mortem report jong ka Kong Victoria D Kharkongor ba la phah ki pulit ka Assam ka la don ka jingmong na bynta ka khlieh jongka ba la tied da ka kynja tiar. Ha ka jingpynlait khubor mynta ka sngi, ka President ka CSWO ka Kong Agnes Kharshiing ka la ong mano ba pynmynsaw ia ka Kong Victoria?, hato ki  Doktor ka  International Hospital lane ki Pulit? Ba lei ki pulit ka Dispur ki kyntait ban ai ia ka video CCTV lada ka don shisha ha  Police Station kumba la kam”,. “Bun ki jingkylli kiba hap ban jubab halor kane ka jingjia”, la ong ka Kong Kharshiing. Ka la ong ba ka kmie jong ka Kong Victoria ka la pan ia ki jingtip bniah halor kane ka jingjia hynrei na ka liang jong ki pulit ki kyntait.
Lah ban kdew ba ka Kong Victoria D Kharkongor la kynnoh ba ka la pyniap hi ialade ha Dispur Police Station ha ka 5 tarik Naitung 2015. Katkum ka jing iathuh ki pulit, ka la iaid sharum shaneng ha International Hospital Guwahati bad ki bor jong katei ka hospital, ki la khot ia ki pulit bad ki la aiti sha ki ha kaba la rah ia ka sha Dispur Police Station ha ka por 9.30 baje mynmiet bad ha ka por 10.20 baje mynmiet, ki pulit ka Dispur Police ki la ong ba ka kwah ban leit sha painkhana bad hapdeng ka 10.20-10.30 baje mynmiet, la lap ba ka la pyniap hi noh ialade, la ong ka Kong Kharshiing.
Ka CSWO ka la ong ba khlem shon dur ha kano ka rukom ba la lap ia ka bad bad ka jingsospen ia ar ngut ki pulit ka dei tang ka jingleh ban pyndep rukom.
Halor kane ka jingjia, uwei u briew ba la tip kyrteng kum u Manbha Kumar Haijam Syiem uba don jingiajan bad ka kong Victoria u la shah kem ha ki pulit ka Assam. Ka Kong Belin ka la ong “nga suba jur ba u Manbha u la die ia ka khun jong nga ha Guwa hati bad haba ka pyrshang ban mareh, ki la tied da ki kynja ba nep na khlieh jongka”  la kynnoh ka kong Berlin. Ia u Manbha Kumar Haijam Syiem la kem da ki pulit dang shen halor ka jingiap ka kong Victoria Kharkongor.
Ki pulit ki la ong ba u Manbha Kumar Haijam Syiem u don kti ha kaban pynlong ia ka jingiap jong ka Kong Victoria hadien ba ki la iasah lang ha Hyderabad.