“Ym donkam pynshai doh masi, la pynshai U Mukul”

Shillong 06 Jylliew:
Halor ka jingkhang jingpynbna ba la pynmih da ka sorkar pdeng ban pyrkhing ia ka jingpyniap ia ki mrad bad ki masi, u Bah Shibun u la ong ba ka party kam donkam shuh ban kren jrong halor kane namar ba u Myntri Rangbah ka jylla u Dr Mukul Sangma u la dep pynshai lem halor kane.
U la ong ba u la iohi ha ki lad pathai khubor ba u Dr Mukul u la pynshai halor kane ka bynta bad kane ka la pynshai ia ka jingsah umdum jong ki paidbah.
Halor ka jingkynnoh jong u Dr Mukul ia u Nalin Kohli kum u nongpeitkai, u Bah Shibun u la ong lah ban long u nongialehkai ialade ha kano kano ka bynta ha ka sain pyrthei hynrei ki kam jong ka sorkar jongu, ka la kren shai ba ka long jiro ha ka jylla.
“U Dr Mukul Sangma u la dep pynshai lem ia kane ba ka dei ka kamram ka sorkar jylla, ka BJP kam donkam shuh ban batai ia kane”, la ong uBah Shibun.
U la ong ba ka bha ba u Dr Mukul un sa iakren pynbeit ban buh sngi ba un iatyrko bad u Nalin Kohli.
Halor ka jingkren kynthah jong u Dr Mukul Sangma ba ka jingiateh lok ki ar tylli ki seng sain pyrthei ka United Democratic Party (UDP) bad ka Hills State People Democratic Party (HSPDP) kan plie lad ia ka BJP ban rung na kyrpong iing, u Bah Shibun u la ong ba kane ka dei tang ka jingkren jongu hynrei ka BJP ka la kren shai ba kan sa buh kyrtong ha baroh ki 60 tylli ki konstitwensi ha ka elekshon MLA ban wan ha kane ka jylla.
U la ong ba ka BJP kam don kata ka jingrung kyrpong iing ne jingrung khmat tynkong iing hynrei ka ieng beit ha ka nongrim jong ka party ban iakhun ia ka elekshon ha ka jylla.
“Ngim don kata ka jingkhangg dieng ne jingkhang khmat hynrei ka party ka kren shai ba kan pynieng ha baroh ki kyrtong ha ki 60 tylli ki konstitwensi”, la ong u Bah Shibun.