Ym don tnad Arts and Culture ka JHADC, dawa ka JSU

Shillong, 3 Lber:
Ka JHADC kam don ia ka tnad kaba peit kyrpang ban pynneh ia ka riti dustur jaitbynriew kata ka Arts and Culture bad ka jingbym don katei ka tnad ka la pynlong ia ka seng Jaintia Students’ Union (JSU) ban dawa na u CEM ka JHADC ba u dei ban thaw noh kyrkieh noh ia katei ka tnad.
La ialam ia katei ka kynhun ban ia kynduh ia u CEM da u President u Rikut N Parien bad u General secretary  u Emperor Bareh kaba la leit ban ia kynduh ia u ma Thombor Shiwat hapoh kamra treikam jong u bad la ai ruh da ka jingthoh halor ki lai tylli ki mat.
Ka mat kaba nyngkong ka dei ban thaw ia ka tnad Arts and Culture, kaba ar ban thaw ia ki kyndon kiba khlain ban pynneh pynsah ia ki lum ki wah bad kaba lai ka dei ban pynbeit noh ia u pud u sam jong ki Elaka baroh kiba hap hapoh ka JHADC.
Ha katei ka jingiakynduh u CEM u la kular ban leh ia kaba donkam.