“Ym don jingthmu ban kynriah ia ka Assam Rifles na Shillong”

Shillong, 2 Jymmang:
U Joint Secretary ka tnad kam pohiing ka ri u Satyendra Garg u la ong ba ka sorkar pdeng kam don jingthmu satia ban kynriah noh ia ka Assam Rifles na Shillong hynrei kan kynriah noh tang ia ka ITBP na Shillong.
Haba kren mynta ka sngi ha Shillong, u Joint Secretary u la ong, “Ngim don jingthmu ban kynriah ia ka Assam Rifle hynrei yn rah noh shen ia ka ITBP na Shillong”, la ong u Garge hadien ba la iakynduh ia ka myntri kam pohiing ka jylla ka Kong Roshan Warjri mynta ka sngi.
Katkum ka jingong jong u Joint secretary ka tnad kam pohiing, ka sorkar India kam shym la don kano kano ka jingmut ban rah ia ka Assam Rifle na Shillong hynrei kan dang iai buh beit ha kane ka jaka.
Dang shen ka North East Student Organisation (NESO) ka la dawa ruh na ka sorkar pdeng ba ka dei ban kynriah noh ia ka Assam Rifles na Shillong nalor ka ITBP.
Ka Assam Rifles ka dei kaba peit ia ka thain mihngi baroh kawei bad ka Shillong ka dei ka jaka kaba biang eh namar ba ka dei ka nongbah kaba donkam bha ia ba kan don ha kane ka jaka.
Hadien ka sorkar ka la rai ban kynriah noh ia ka ITBP na Shillong sha Arunachal Pradesh, ka NESO ka la dawa ba ka sorkar pdeng ka dei ban weng noh ia ka Assam Rifle bad ka Air Force nangne na nongbah Shillong.
U Chairman ka NESO u bah Samuel Jyrwa u la ong ba na ka por sha ka por ki seng bhalang ki la dawa na ka sorkar pdeng ba kan weng noh ia ki ktem shipai na nongbah Shillong bad dei ban pynphai biang ia ki jaka ba ki la kurup sha ki trai jaka kiba dei hok kiba long trai ia kitei ki jaka.
Ha kawei ka liang, u joint secretary u la ong ba katkum ka jingtip ka sorkar pdeng, u  u heh shipai ka United Liberation Front of Asom (ULFA) u Paresh Baruah u don shano re shano namar ba um don ha Bangladesh.
U la kyntait ban iathuh ia ka jaka rieh jong u heh ka ULFA hynrei u shu ong, “Katkum ka jingtip jong ngi u Baruah um don ha Bangladesh, u don shaei re shaei”.