Ym don jingpyrwa ki nongmihkhmat ia ka surok naduh Mawphlang sha Balat

Shillong,6rymphang:
Ka Mawsynram Youth Welfare Organization (MY WO) ka la pynpaw ia ka jingsngewkhia kaba jur halor ka jinglong jingman ka surok naduh Mawphlang shaduh Balat , kaba pyniasoh ia ki spah tylli ki shnong kynthup ia ki nongheh kum ka Mawsyn ram, Lawbah, Hat Maw don, Balat, Ranikor, Maw kyrwat . Ka seng ka la kynnoh rurh ba ki nong mihkhmat kiba dei jong kitei ki thain kim shym la pyrwa wat lada ki iaid lyngba katei ka surok la jan manla ka por.
Ka seng ka la ong ba ki paidbah katei ka thain ha ka jingiakynduh bad ki nongialam jong ka ki la pynpaw ia ka jingsngew diaw bad ki jingbynniaw ia ka jingbym shimkhia jong ki bor ba dei khmih bad ki Nongmihkhmat ia katei ka surok. Ka la ong ruh ba katei ka surok ka long kum u bud lum na ka bynta u paidbah byllien uba pyndonkam ia ka bad ban wanrah ruh ia ka roi ka por ha ki shnong nongkyndong, hynrei ka la kylla long ka jingisaitmet bad ym don satia mano mano ban iaid na kane ka lynti khlem da thnum ia ka jingsniew, ka jingrit, jingkhapngiah jong ka bad ka jingbym shngain na ka bynta ki kali.
Ka seng ka lyngngoh ba kumno ki bor ba dei khmih kim shym la khein snep satia ban phai sha kane ka bynta bad la ju don ruh ki snem ba la siang hynrei ka neh tang shipor. Ka MYWO ka la kynnoh ba katei ka pyni ba ka jingbamsap kaba shyrkhei ka la iaid ha kine ki snem kiba la dep ha ka jingpynbha bad pynheh ia kane ka surok bad ka la ong ba bunsien ki ju kynnoh ba dei na ka jingslap ba kane ka surok ka kylla long kumtei. “Kane ka la buh ia ki paidbah ha ka jingeh bad ki la jynjar shikatdei eh ban iaid na kane ka surok namar ka lynti ba jan ka la kylla long kaba jngai bad bam ia ka por bad wat ki nongjngohkai pyrthei ruh ki kiar ban leit ban wan sha kine ki thain” ong ka kyrwoh na ka MYWO.
Katei ka seng ka la pynpaw ruh ia ka jingsngewsih kaba jur namarba ki Nongmihkhmat jong ki constitwensi kiba pher bapher kiba iaid lyngba katei ka lynti ruh ki shu sngap mynthi bad kim don jingpyrwa satia. Namar kitei ki jingeh, ka seng ka dawa na ki bor ba dei peit ba kin pynbha noh marmar ia kane ka surok khlem da pynslem shuh shwa ba ka aiom lyiur kan wan. Ka la byrngem ba lada ym lah ban pyndep, ka seng ryngkat bad ka jingkyrshan bad jingpynkup bor jong ki paidbah, kam banse ban shim da kiwei pat ki lad na ka bynta ka jingbha kane ka surok bad ban wanrah pat ia ka suk ka sain ha ka iaid ka ieng jong u paibah bad ruh na ka bynta ka roi ka par ha ki liang baroh.