Nongstoiñ: Ki paidbah nongshong shnong kiba shong ba sah ha ki thaiñ khappud bad ka Jylla Assam, mynta ki la don hapdeng ka jingsheptieng bad rit mynsiem tang namar ba kila bna ia ka khubor kumba la thoh ha kawei na ki kot khubor Khasi bad Phareng kaba la ong ba ki la don haduh kumba 600 ngut ki nong shong shnong ka thaiñ Malangkona kiba la phet lut na ki iing ki sem jong ki namar ba ki tieng ia ka jingshah kem ha ki pulit Assam khlem kano kano ka daw.
Hadien ka jingmih jong katei ka khubor na ka liang jong ki katto katne ki nongthoh khubor, ki la pyrshang ban buddien bha bad ruh ban pyntikna na ki bor pyniaid District bad kumjuh na ka tnad pulit ha kaba iadei bad katei ka jingjia hapoh ka thaiñ Malangkona, hynrei na ka liang jong ki heh District bad ki pulit kila iathuh da kaba ki ong ba kam don kano kano kaba kum katei ka jingjia kaba la mih kumba la thoh ha kitei ki kot khubor bad kila ong ruh ba ki lah ban dei tang ka jingialam bakla kaba pynsheptieng ia ki paitbah kiba sah ha ki thain khappud.
Ha kaba iadei bad katei ka bynta na ka liang jong u Superintendent of Police ka West Khasi Hills,u bah G.D. Kharwanlang haba iakren sha ki nongthoh khubor u la iathuh ba hadien ki jingjia kiba la mih hadien ka jingwan jong u Myntri ba dei peit ia ki kam pohiing jong ka jylla u James K Sangma ha ki taiew ba la lah na ka liang jong u kum u khlieh jong ka tnad pulit ha West Khasi Hills u la dep ban phah pulit ha kaba la dep ruh ban shna ia ka ktem (Camp) jong ki pulit ha Malangkona, da ka jingthmu ban ai jingiada ia ki paitbah kiba sah ha kitei ki jaka bad naduh ba ki pulit Meghalaya kila don ha katei ka jaka ym shym la don shuh kano kano ka jingia huri hura ha katei ka thaiñ haduh mynta bad ki paitbah ki la don hapdeng ka jingshongsuk shong sain bad kam shym la don shuh ka jingtuklar na ka liang jong ki pulit Assam namar ka don ka jingia burom mar kylliang.
U SP u la iathuh ruh ba ka don ka jingphet shnong jong ki katto katne ngut kumba 6 lane 7 ngut kiba don case bad ki pulit Assam ha kaba haduh mynta ki dang phet rieh na ki pulit Assam namar ka jingtieng bad kam dei ba ki pulit Assam ki kem lut kat ia kiba don kumba la kynnoh namar kadei tang ka buit jong kitei ki briew kiba la don case teng bad ki pulit ban lait phet na kti jong ki pulit.
Shuh shuh ka khubor na katei ka thain la iathuh ruh ba kitei ki briew kiba don case hapoh Assam ki la wan ban kyrpad ruh na ki heh pulit Meghalaya ban iakren halor katei ka kam hynrei na ka liang jong ki heh pulit jong ka West Khasi Hills ki la kyrngah ban iarap namar kadei ka case ba la register hapoh Assam ha kaba na ka liang jong ki pulit ka West Khasi Hills ki la kyrpad iaki ba kin leit aiti ialade sha ki bor ka ain.
Ki heh pulit ka thain ki la iathuh ruh ba katkum ka dur kaba la paw bad mih ha kitei ki kot khubor kaba don da ki spah ngut kadei kaba shisha namar ha katei ka sngi ki ia lum jingialang namar ka jingwan jurip jong u MLA ka Rambrai Jyrngam hynrei kamdei ka dur ba ki thmu ban phet shnong namar ha ki thaiñ khappud shisien ba wan uno uno u heh sorkar ne u SP ne ki ADC ki ialum paitbah ban pynpaw ia ki jingeh jong ki.
Ka tyllong khubor ba la iohlum napoh thaiñ Malangkona ka ong ruh ba ki jingjia hapoh thaiñ khappud hapdeng ka Assam bad Meghalaya ki ju jia man ka por hynrei kidei ki jingjia kiba rit baria hynrei kim da dei eh palat haduh ba kin mih shnong lut.
Ha kaba iadei bad katei ka bynta na ka liang jong u SP ka West Khasi Hills u Bah G.D.Kharwanlang u la dep ban phah ia ka kai phod ha kaba kadei tang ka jingpynheh jongno re jongno bad ym shym don kano kano ka jingphet shnong kumba la paw.