Ym don jingiakren eiei ia ka article 371, ka 6th Schedule ka ai bor laitluid, ong u Conrad

Shillong: U Myntri Rangbah ka jylla u Conrad K Sangma ula ong ba kam don eiei ne kano kano ka jingkren na ka sorkar halor ka Article 371 ka riti synshar ka ri India.
Ia kane la jubab halor ka jingkylli kaba la wanrah da u MLA ka North Shillong, u bah Adelbert Nongrum hapoh ka iing dorbar mynta ka sngi.

U Conrad u la ong ba ka jylla ka don ha ka Sixth Schedule bad kam don ka jingdonkam ban dawa ia ka article 371 hynrei watla katta ka sorkar kan sa eksamin. U la ong ba ki don ki jingmyntoi bad ki jingduh jingmyntoi ha ka Sixth Schedule bad ka Article 371.

Ha ka Sixth Schedule ki Autonomous District Council ki don ka bor laitluid ban thaw ain, ka bor bishar bad ka bor pyntreikam hynrei ka Article 371 kam don ia kine ki bor. U la ong ba ka article 371 ka don bun ki kyndon kaba iapher na kawei ka jylla sha kawei pat bad kum ha jylla Maharashthra bad Gujarat ka ai bor ha u Lat ban thaw tang ia ka Development Board bad ban iasam ia ka pisa sha ki kynhun bapher bapher bad kam kdew eiei halor ka jingpyntreikam ia ki ain ka sorkar India.

U Conrad u la ong ba lada ka article 371 ka long ha Nagaland ka donkam ban iakren.
Lah ban kdew ba u MLA ka Nongkrem u bah Ardent Miller Basaiawmoit ula wanrah ia kane ka mat ha ki snem ba la dep ha iing dorbar hynrei ka iing dorbar ka la kyntait mardor.
Haba wanrah jingkylli halor kane, u bah Adelbert u la ong ba lada ka jylla ka ioh ia ka Article 371, ka lah ban iada kum ia ka Uniform Civil Code (UCC) bad kiwei ki ain ka sorkar India.
Hynrei u Conrad u la ong ba ka sorkar jylla kan ieng pyrshah ia ka UCC lada ka khnoit ia ki riti dustur, ki hok jong ki paidbah bad ka jinglong tynrai ka jylla. Ka UCC kaba pass ka Uttarakhand, la pyllait ia ki riewlum na ki kyndon jong ka UCC bad kane ka kam ka donkam ban iakren kham bha.
Na ka liang u nongialam liangpyrshah u Dr. Mukul Sangma ula ong ba ka Sixth Schedule ka la nang khlain ha ka jingpynkhreh ban pynkylla ia ka Sixth Schedule ha kaba bun ki sobjek ka sorkar jylla ruh la aiti sha ki Sixth Schedule bad kaba donkam ka long ban wanrah biang ia ka Para 12 A bad B kumba ka long mynshwa khnang ba ki ain ba la thaw ki district council kin ym shah dain ha ka sorkar jylla.