Nongstoin,
13 Jymmang:
Ka KHNAM ka la lum ia ka jingialang mynta ka sngi ha Council Hall ha Nongstoin ban iatai halor ka jingthmu ka sor kar ban ai jaka rieh tngen bad ban thaw ktem ia ki lehnoh ANVC-B ha West ne South West Khasi Hills , la wan ban ia shim bynta da ki sengbhalang bapher bapher bad kumjuh ruh na ka liang ki seng sain pyr thei la wan ka HSPDP.
Haba ia kren bad u Working President ka KHNAM u bah Adilbert Nongrum , u la ong ba ha katei ka jingialang la wan ban ia shim bynta haduh kumba 150 ngut eiei ki paidbah kynthup ia ki sengbhalang na ka thain West bad South West Khasi Hills kiba na ki shnong nongkyndong kiba dang jngai na Nongstoin. U la iathuh ba katei ka jingialang ka la rai ban pyrshah ia katei ka jingthmu ka sorkar ban thaw ktem ia ki lehnoh ANVC-B ym tang ha West bad South West Khasi hills hynrei ha baroh ki jaka kiba dang hap hapoh u pud u sam ka
Ri Khasi -Jaintia.
U bah Adilbert u la iathuh ruh ba katei ka jingialang ka la shim ia kawei ka rai ban leit rah ia kitei ki mat jingdawa sha u Myntri Rangbah ka jylla u Dr.Mukul Sangma, ban pynpaw ia ka jingpyrshah ban thaw ktem ia ka ANVC-B. Haba la kylli la ka don ne-em kano kano ka jingtip na ki nongshong shnong ha kito ki thain ia ka jaka ba ka sorkar ka thmu ban buh, u bah Adilbert u la ong ba kim don jingtip hangno ka sorkar ka thmu buh ktem bad ki ieng beit ha ka nongrim ba hangno hangno ruh ym shah katba ka dang hap hapoh u pud u sam ka ri-Khasi.
Na katei ka jingialang la thaw ruh ia ka Vigilance Committee ka ban peit ngor ia kitei ki thain khamtam ha ki khappud , bad la buh ruh ia ka rai ban dawa na ka sorkar ba kan thaw ia ki Police Outpost ha kylleng ki jaka kiba don ha khappud ha baroh kawei ka Ri Khasi.
Phi don ban ong eiei?