Shillong, 11 Nailur:
Ka Primary Health Centre (PHC) Mawlasnai ka la sah thylli khlem doktor la shi bnai ei ei mynta bad namar kane ka daw, ki paidbah ka thain kiba iakynduh ha ka pang ka shitom ki la hap ban beh shaduh Bhoirymbong ban shim dawai ne shah sumar.
Ka Confederation of Ri Bhoi People (CoRP) Khlieh Umstem Unit hapoh ka jingialam President bah Fairlyston Teron ryngkat bad u President ka Umiam Circle bah Samlang Pdahkasiej ki la leit ban kynduh ia ka District Medical and Health Officer (DMHO), Ri Bhoi District hynne ka sngi bad kyntu ba kin phah noh kloi ia ki doctor ha katei ka jaka sumar khnang ba paidbah ka thain kin ioh lem ia ki lad jingsumar ha ka pang ka shitom.
Ha katei ka jingiakynduh na ka liang ka DMHO ka la ong, ba na ka daw ba duna doctor bad ki don ruh ki doctor kiba hab ban leit pyndep ia ki training, kumta ka sorkar ka shem jingeh ban phah doctor ha ki PHC.
Watla katta ruh, ka la kular ban phah ia ki doctor shisien shitaiew, kata ha ka sngi iew Mawlasnai na bynta ban iarap ia ki paidbah shipor kat haduh ban da ioh ia u doctor ba pura, ka la ong.
Hadien ka jingiakynduh bad ka DMHO, ka CORP ka la buh por hapoh 20 sngi ban phah doctor ha ha katei ka PHC, bad ka kyntu jur ia ki bor ka tnad ka koit ka khiah ban shimkhia khang ba ki paidbah kin ym mad ia ki jingeh.
Phi don ban ong eiei?