Ym don doctor, ym don dawai, ujor ki paidbah ha PHC Namdong

Jowai, 24 Jymmang: Mynta ka sngi ka kynhun ki nongialam bad ki dkhot ka FKJGP- Jaintia Hills ha ryngkat ki rang bah shnong bad ki nong ialam shnong hapoh ka lama jong ka Sanshnong Development Committee jong ka thain Namdong ki la leit ban jurip ia ka Namdong PHC bad la lap ba katei ka PHC kam don satia ia u Doctor lait noh ka Doctor Ayurvedic bad u Doctor bniat (Dentist).
Katei ka PHC kam don Doctor MBBS naduh ba u Doctor u la leit ban pule pyntbit shuh shuh.
“Ngi la ioh ia ki jingujor na ki paidbah bad halor ka jingujor ba um don doctor bad um ju kham ioh dawa, ngi la rai ban jurip ia katei ka jaka ai jingsumar”, la ong u Tuesday Lytep, President ka FKJGP JH.
Ha katei ka jingjurip la lap ba ka Namdong PHC ka la dep ioh ia ka building kaba heh ha ryngkat ki jaka sah ki nongtrei naduh u Doctor bad ki Nurse, na ka bynta ban kyntiew kyrdan ia ka sha ka CHC, hynrei namar ba ym pat shym la plie ia katei ka CHC, katei ka jaka ai jingsumar ka dang treikam haduh mynta tang kum ka PHC.
Ki Nurse kiba dei ban trei hapoh katei ka PHC, la shu kynriah shawei pat bad katei ka PHC ka dang duna nongtrei na kawei ka por sha kawei pat. Na ka liang ka FKJGP bad ka Sanshnong Development Committee ka la ong ba kan leit ia kynduh ia ki bor ba halor jong ka tnad ka koit ka khiah ban pynsngew ha ki ia ki jingeh kiba ki paidbah ki ia kynduh ha katei ka jaka ai jingsumar.
Ki nongtrei hapoh katei ka PHC, ki la pynpaw ruh ba ki ia kynduh jingeh shi katdei eh ha kaba iadei bad ki dawai, namar ki nongpang kiba wan shim dawai ki bun, katba ki dawai pat ki duna.
Nalor ka jingduna ki nongtrei, katei ka jaka ai jingsumar ka ia kynduh jingeh ruh ha ka bording bad ka um. Lada don ka bording, ka um ruh ka biang, hynrei lada thut ka bording, ka PHC kam ioh um satia namar ka shaniah beit ha u Motor ban tan ia ka um na ka bynta ki jingdonkam ha katei ka PHC.
Na ka liang u Presidentka Sanshnong Development Committee, u DS War u la kyntu ia u local MLA uba dei ruh u Myntri sorkar ban shimkhia ban peit ia ka bha ka miat jong katei ka PHC khnang ba ki paidbah ka thain kin ioh myntoi.