Shillong: U MLA ka North Shillong u Adelbert Nongrum u don lang ha ka Meghalaya Democratic Alliance (MDA) ka sorkar synroplang jong ka jylla, hynrei u khlem don bynta lang ban ia jied kyrtong monlang na ka bynta ka MP ilekshon sha Rajya Sabha.
Dang shen ka komiti jong ka sorkar MDA ba lamkhmat da u symbud myntri u Prestone Tynsong ka la pynbna ia u Dr. WR Kharlukhi kum u kyrtong monlang na ka bynta ka ilekshon MP sha Rajya Sabha.
U Bah Adelbert Nongrum u la ong ba ka jing bym don bynta lang jong u na ka bynta ban jied kyrtong MP kadei namar ba um lah ban klet ia ka jing kyrshan ka Agatha Sangma ka MP na Tura ia ka CAA 2019 hapoh ka ing dorbar thaw ain ka ri India ha u snem 2019. U Adelbert Nongrum u la ong ruh ba um dei u niangkohnguh ban shu kohnguh beit katba ong ka sorkar.
U la ong ruh ba ka jing kyrshan ka NPP lyngba ka Agatha Sangma ia ka CAA 2019 ka la ktah ym tang ia ka jylla Meghalaya hynrei ia ka thain lam mihngi baroh kawei bad ka jing kyrshan jong ka NPP ia ka ‘Resolution’ ban pyntreikam ILP hapoh ka jylla Meghalaya ka dei tang ban pyn jai jai ia ki jing iakhih jong ki paidbah ka jylla.
U Bah Adelbert Nongrum u la ong ruh ba ka por kan sa batai ia ka jing mih noh jong u na ka sorkar synroplang ka jylla Meghalaya ka MDA.
Phi don ban ong eiei?