Ym don bamsap ha ka Tamasa Monolith Mawphlang

Shillong,
12 Rymphang:
Ha u snem ba la dep, ka la mih ka jing kynnoh ba ka don ka bamsap kaba shyrkhei bha ha ka tamasa Monolith kaba la long ha Maw phlang bad dei namar kane ka daw ba ka KHADC ka la pynsangeh teng noh ia katei ka tamasa kat haduh ban da dep ka jingtohkit kaba ka la phah tohkit. Ha ka jingiakren bad u CEM ka KHADC u bah Adelberet Nongrum mynta ka sngi ha kamra treikam jong u , u la ong ba ka jingtohkit halor kane ka jingkynnoh bamsap ka la dep, hynrei um pat treh pat ban ia thuh namar ba u kwah ba ka ripod kan mih beit hapoh Ing Dorbar.
Hynrei u Deputy CEM u bah Teinwell Dkhar uba peit ruh ia ka tnad Arts and Culture ha ka EC kaba rim, u la iathuh ba kam don eiei ha ka ripod jong ka jingtohkit bad baroh ki biang lut, katkum ka jinglap jong U Nazir, u Ex.CE PWD Building uba thew ba woh bad tohkit ia katei ka kam. U bah Tein u la ong ba u Enjiniar lyngba ki jingthew jingwoh jong u u lap ba baroh ka biang lut, kam don eiei, bad la sngewthuh na ki jingkren u bah Tein ba kam don ka jingbam sap ha ka Tamasa Monolith.
La ka KHADC kan pynlong biang ne-em ia ka Monolith Festival ha Mawphlang ka dei ka jingkylli kaba ju mih ha ki sngi kiba la dep, u CEM ka KHADC u la ong ba katei ka tamasa ruh ka long kaba donkam ban pyni nam ia ki tiar tynrai bad ki rukom im tynrai jong ngi, hynrei kaba kham kyrkieh eh ia ka KHADC ka dei ban thaw shuwa ia ki ain kiba donkam bha na bynta ka jaitbynriew. U CEM um shym la ai ka jubab kaba shai la ka KHADC kan pynlong biang ne-em ia katei ka Tamasa, bad u la ong bay n sa ia kren hapoh ing dorbar.
Hynrei u Dy.CEM ha katei ka por u la knieh ktien noh bad u la iathuh ba ha ka jingshisha ka KHADC ka la thmu ban pynlong ha u lber ne iaiong mynta u snem, hynrei ka jingeh kaba khanglad ban pynlong ia katei ka tamasa ka dei na ka daw ka jingbym don pisa ka council. U bah Tein u la ong ba ka Council ka hap ban shu ap ia ki pisa na ka 13th Finance Commission. U la ong ba katei ka pisa ka dei kaba la dep ban mynjur bad kaba sah mynta ka long tang lano ba kan poi hynrei ka jingwan te kan wan beit, bad u la ong ba tang mar ia ioh pisa ka KHADC kan pynbna lano kan pynlong Monolith Festival.