Shillong:Ka kong Sweet Bikonia Lyngdoh tron, kaba shong bad sah ha Umlyngka Upper Shillong, ka la ai khublei kyrpang ia kiba kyrshan ia ka, ha ka jingleit shim bynta jong ka, ha ka Mrs Pageant Tourism 2022, ba la long ha u bnai ba la dep ha Nongbah Thailand.
Ka kong Tron, ka la iathuh ba ka la ioh ruh ia ka burom, kum ka Ambassador for queen, ha ka 2tarik mynta u bnai. Ka la iathu shuh shuh ba ka la shah jied ruh kum ka Ambassador jong ka mega star production.
Ka la ong ba ka jingjop jong ka, kan ai mynsiem shuh ia ka ban synñiang lem ia ki nongshong shnong jong ka jylla khamtam ia ki kynthei hapoh ka jylla.
Haba iathuh ba ka dei ka mon laitluid jong ka bad ka sien ba nyngkong ba kan leit shim bynta sha kane ka rynsan, ka mad ia bun ki jingeh khamtam lei ha ka liang jong ka pisa pilaiñ, namar kam shem la wan na ka ïing ka sem ba dap ba biang.
Haba iathuh ia ka jingkynduh bad pynsaphriang lem sha kiwei pat ki jaitbynriew na kylleng ki ri jong ka pyrthei shaphang ka jylla jongngi, ka ong ba ym don ba tip shaphang ka jylla Meghalaya, hynrei ki tip beit tang ia ka ri India.
Haba iathuh shaphang kane ka Mega star production, ka la ong ba kane ka kynhun ka don ia ka thong ban iarap ia ki longkmie kiba ioh ia ka jingpang breast cancer, ka iathuh wat la ka dei ka juk jong ka saiañ bad ki dawai ki dashin, hynrei kane ka kynhun ka don ruh ia ka thong ban sumar lyngba ki dawai kynbat ba ki nongsumar na ki jylla jong ngi ruh ki lah ban sumar bad peit thuh lem ia ki jing iada ban iarap ia ki longkmie ba shah ktah ha kane ka jingpang.
Ka kong Sweet, ka la pynpaw ka jingsngew nguh bad burom shi katdei ia u bah Prestone Tynsong, uba long u MLA jong ka 27 Pynursla kontitwensi bad ha kajuh ka por kum u symbud myntri Rangbah jongka jylla Meghalaya, uba la ai mynsiem bad iarap btin lynti lem ia ka da ki kyntien ai mynsiem bad sneng ha shwa ba kan leit shim bynta sha Thailand, ryngkat ka jingkyrshan jong ka Sorkar jylla ruh kumjuh.
Phi don ban ong eiei?