Ym don ba pyntip ia ngi, ong U Pastor rangbah ka KJPA “Halor ka jing ialang plie iing iingmane ka sorkar Jylla”

Shillong:Myn hynnin ka sngi, ka sorkar Jylla, ka la khot ia ka kynhun jong ki riew niam bapher, ban iakren halor ka sobjek jong ka jingplie ia ki iingmane, hynrei ki nong ialam ka Khasi Jaintia Presbyterian Assembly (KJPA), kim shym la leit satia sha katei ka jing iakynduh ba la pynbeit da ka sorkar Jylla.

U Pastor P Hynniewta, uba dei U Pastor rangbah ka KJP Assembly, haba la kylli, da u nongthoh khubor, halor ka jing ialang kaba mynta ka sngi, ula ong “Ym don ba pyntip ia ngi”.

Halor ka jing kylli, la ka KJP Assembly, ka don bynta lang ne em bad ka Shillong All Fairth Forum (SAFF), U Pastor, ula ong “Ngim don bynta eiei” hynrei, ula ong shuh shuh “Ki don ki dkhot kiba leit da ka mon sngewbha jongki hi”.

Haba la kylli pat, la ka KJPA, ka la mynjur ne em ban plie noh ia ki iingmane ha U Risaw, kumba la ai jingmut, da ka sorkar Jylla, U Pastor, ula ong “Ngam lah ban ong eiei, hap iakren ia kata”.