Ym don ain kaba khang ban long Principal kiba pyndep B.Ed, ong ka KJDSTA

Shillong:Ka Khasi Jaintia Deficit School Teachers Association (KJDSTA) ka la lyngngoh ia ka jing kyntait ka District School Education Officer (DSEO) ka East Khasi Hills ia ka jingthung ka School Managing Committee (SMC) ia ki nonghikai  ba la pyndep ia ka kyrdan jingpule Bachelor of Education (B.Ed) ban shim kum ki Principal ne Vice Principal ha ki Secondary bad Higher Secondary school.
Ha ka jingpyllait khubor, u President ka KJDSTA, babu Kular Khongjirem u la ong “Wat ka Draft Service Rules ia ki skul bym dei sorkar ruh, ka la kdew shai ba ia ka kam Principal ne Vice Principal ia ki Secondary School ne ia ki Higher Secondary School kam da donkam ban dei kiba pyndep ia ka Post Graduate hynrei ka shu pynmih ia ka ktien ‘kham mon’ (preferably), katkum ka jingsngew bit ki SMC”.
U la ong ba ki nonghikai skul deficit kim ju ioh jingpynkiew kyrdan sha ka kam Principal ne Vice Principal bad kata ruh wat hadien ba ki la shakri palat ia ka 25-30 snem. Bun na ki, ki la rung kam kum ki Assistant Teacher bad ki shongthait ruh ha kane kajuh ka kyrdan.
Dang shen, ka District School Education Officer (DSEO) ka East Khasi Hills ka la kyntait ia ka jingthung ka School Managing Committee (SMC) ia ki nonghikai kiba la trei slem bad kiba la pyndep ia ka kyrdan jingpule Bachelor of Education (B.Ed), da kaba ka la ai daw ba ia ka kam Principal ne Vice Principal dei ban shimti ne thung tang kito kiba la pyndep ia ka kyrdan Post Graduate.
Ha ka jingshisha, kam don satia kano kano ka kyndon ne ka hukum kaba la pynmih na ka sorkar sha ki skul halor kane. Ka Education Policy ka jylla ruh kam kren eiei halor kane.
Halor kane, ka KJDSTA, ka la iakynduh ia ka DSEO ha kane ka sngi Saitjain ban twad jingtip halor kane ka jingshah kyntait ki nonghikai ba la pyndep ia ka B.Ed ban shah thung kum ki Principal ne Vice Principal khlem kano kano ka hukum ne ka kyndon na ka sorkar.
“Ka DESO ka la pynthikna ia ki nonghikai ba kan rah ia kane ka kam sha ka tnad Directorate, khnang ba kito ki nonghikai kiba dei hok, kim nym shah ktah na ka bynta ka jingbit jingbiang ka pule puthi”, la kam u Babu Kular.