Ym dei u Rangbah Shnong, uba shah shoh, dei ma nga,uba shah thombor, ong U bah Goldenstar

Shillong: U bah Goldenstar Khongwar u la wanban pynshai ha ki nongthoh khubor hynnin ka sngi halor ka jing shah kynnoh ba u la thombor ia u Rangbah Shnong ka Baridua u bah Ioanis Narleng Ribhoi district myn ha ka 19 tarik u Jylliew 2019, hadien ka jing mih khubor ha ki katto katne ki kot khubor.

U bah Goldenstar Khongwar u la ong, “Ym dei u rangbah shnong u ba shah shoh bad mynsaw ha ka 19 tarik u Jylliew 2019 hynrei dei ma nga u bala shah thombor bad shah pynmynsaw ha kaba u rangbah shnong u ba kyrteng u Ioanis Narleng ryngkat bad u para jong u, u Markus Narleng lem bad ki paralok jong u, ki ba long ki bar Jylla ki la rah da ki tiar pynmansaw bad ki la thombor bad thmu ban pyn iap ia nga.’

Kat kum ka jing iathuh u bah Goldenstar kine ki jing ia kynad ka long hadien ka jingleit pan ia ka certificate shnong na u rangbah shnong. hynrei u la kyntait ban ai.Na ka liang u bah Goldenstar u la leit ban ujor ia kane ha u Syiem Mylliem bad kumjuh ha KHADC bad ha ka 15tarik u Jylliew 2019 ha ka por 7:30 janmied u rangbah shnong lem bad ki paralok jong u ki la shoh ia u bah Goldenstar ha iew Baridua.

Na ka liang u bah Goldenstar ha ka 19 tarik u Jylliew 2019, ki la leit ban pan ia ka jing pynshai ia ka jing bym ai certificate shnong bad ka jingjrongkti ia u ne u rangbah ha ing u rangbah shnong hynrei u rangbah shnong lem bad ki paralok jong u ki la thombor bad pom da ka wait ia u bah Goldenstar.