Ym dei Lyngdoh Thabah, ai beit jait Thabah, ong ka Seng Kur

Shillong:Ka seng kur Lyngdoh Thabah Seng kmie kan pynlong ia ka jingrakhe ia ka Silver Jubilee, ha kaba kan pynlong da ka jingiakynduh lang jong baroh ki kur ha ka 16 tarik Nohprah 2023 ha Ïingdorbar Jaiaw Lumpyllon ha ka por 10 baje mynstep.

Haba iathuh ia kane, u president jong ka kur Thabah Sengkmie u bah N.R Thabah, u la ong ba kin don shibun ki prokram nalor ka jingpynrung dkhot thymmai ha ki bynta bapher bapher ha ka shatri jong ka kur Thabah.
“Ngi khot ngi wer ia ki para kur ba kin ia poi ha ka tarik ba la buh khnang ba kum ka kur ngin nang khlaiñ bad iar”. U President u la kyrpad ruh ia kito ki parakur kiba pyndonkam tang Lyngdoh ha ka jaka jong ka Lyngdoh Thabah ba ki dei ban pyndonkam biang ia ka jait kumba ki juh leh mynshwa.

Ki don shibun ki jait Lyngdoh ha Khasi, Jaiñtia, ki dei ban pyndonkam beit ia ka jait Thabah, khnang ba kan ym don ka jingbakla khamtam ia kito kiba dang don jingiadei.
Ha kane ka sngi u General Secretary jong ka kur Thabah Sengkmie u bah RB Thabah, u la iathuh ba kan don ruh ka jingpynkup burom ia ki kur kiba la pass bha ha ki jingpule bapher ba bapher ki jong ki naduh ka matrik haduh PhD, kumjuh ruh ban pynkup burom ia ki riew rangbah jong ka kur kiba la don 80 snem karta.
Namar ka jingdon jong ka khlam ha u snem 2020, kan don, ka jingpynkup burom ia ki samla pule kiba la pass bha ha u snem 2021 haduh 2023 ruh kumjuh.

Kumba 500 tam ki dkhot kur na kylleng ki bynta kin poi sha ka jingiakynduh lang, la iathuh u president jong ka Seng Samla kur Thabah u bah Kiewshaphrang JW Thabah ha kaba u la ong ruh ba ka jingpoi jong ki para kur ka lah ban bun bad ka resol jong ka lucky draw jong ka kur yn sa pynbna ha katei ka sngi ha kaba la kyrpad ia baroh kiba thied ia ka tiket kin wanrah ioh ki jop.

U General Secretary jong ka seng samla kur Thabah u Banteibor Thabah, u la iathuh ruh ba yn sa pyllait ha katei ka sngi ia ka almanak jong ka kur Thabah na ka bynta u snem 2024 ha kaba la buh jingkyrpad ruh ia ki samla jong ka kur Thabah ba kin ia poi lang ha katei ka sngi.