Ym dei ka UCIL, ba ia kynduh CS

Shillong,16 Jylliew:
Ka Uranium Corporation of India LTD lyngba u bah F.D Rynjah OSD UCIL, Shillong ka la pynshai ba ka jingmih khubor kaba U Rupang u la pynmih ha ka jingthoh kaba la ong ‘Kynduh CS ki heh UCIL;pyntieng koh tympan ban weng noh ia ka Projek Wahkaji’ ka dei ka khubor ka bakla bad u la ong ba kam shym la don kano kano ka jingialang hapdeng jong ki ophisar bad ki enjiniar katei ka tnad bad u Chief Secretary ka jylla.
Halor kane ka phang, na ka liang jong U Rupang, u pynshai ba kam dei ka UCIL, hynrei, ka dei ka tnat thaw surok, kaba ia kynduh ia U Chief Secretery, wat la ka jing iakren, ka dei halor ka kam shna surok West Khasi Hills, kiba kynthup ruh ia ki par ba don Uranium.
Ha kawei pat ka khubor, la ioh khubor ba hynnin ka sngi, na ka liang jong ka Seng Hynniew trep Achik National Council (HANC) kawei na ki seng bhalang na West Khasi Hills ka la wan ban ia kynduh bad ai dorkhas ha ki heh ophisar jong ka tnad Road Transport Highway jong ka sorkar pdeng kaba la lam khmat da u V R Rajwat bad ka ba la wan ban ia kynduh ia u Chief Secretary jong ka jylla Meghalaya hynnin ka sngi ban ia kren halor ki skhim shna surok ha kane ka jylla kiba dang ap mynta ban ioh ia ka No Objection Certificate. Katei ka seng ka ai ruh ia ka dorkhas sha u Chief Secretary ka jylla ba kum ka seng ki kwah ban pyntrei ia kine ki surok ha West Khasi Hills.
Haba kren ha ki lad ai khubor ha phyllaw Secretariat ha dien ba kila dep ban ia kynduh ia ki heh jong ka tnad Road Transport Highway bad ia u Chief Secretary ka sorkar jylla, u Bah Riki Sohlang U president ka Seng HANC u la iathuh ba ha kane ka jingiakynduh na ka liang jong u V R Rajwat, u la kren shai ba ia ka NOC ban shna ia ki surok hapoh jong ka West Khasi Hills dei ban ai noh hapoh shibnai lada ym lah kin rah noh ia ki skhim sha shna surok na kane ka jylla sha wei. La iathuh ruh ba baroh ki skhim shna surok ki la kot kumba T.4000 klur tyngka na ka bynta ka jylla Meghalaya.
“Ka seng ka kwah ba ia kane ka surok dei ban shna noh na ka bynta ka jingmyntoi ki paidbah katei ka thaiñ bad ba ka KHADC ka dei ban ai ia ka NOC ha kaba ia dei bad kine ki surok,” la ong u Bah Riki Sohlang bad ha kane ka sngi la wan ruh ban synrang lang da ki Rangbah Shnong kiba don saw dong ka thaiñ Rangblang ha kane ka jingiakynduh bad ka sorkar. Kum ban shu pynkynmaw ba halor kine ki surok ha West Khasi Hills bun na ki seng bhalang ki la pynpaw ia la ki jong ki jong ki jingsngew ha kaba ki don kiba pyrshah ia ki ne ki surok bad ki don ruh kiba pdiang sngewbha. Kine ki surok baroh ki don sawdong jong ka jaka ba don Uranium.