U bah Wanjanlang Khongtani
Ha ka jingleit jong u nongthoh khubor sha Lyndem, kaba don harum ka shnong Pynursla, la ioh ban ia kynduh ia u bah Wanjanlang Khongtani u Mama jong u khynnah uba la khlad, ha kaba u la pynshai ba ka kyrteng jong u pyrsa jong u uba la khlad u dei u Khrehlang Khongtani, ym u Kerlang kumba la paw ha ki khubor bad u la ong ba ka rta jong u khynnah kam dei 13 snem, hynrei ka dei 16 snem.
La iathuh ba u Khrehlang Khongtani, u dei u khun ba saw jong ka kong Laisen Khongtani bad u bah Kmensing Khongtim bad dang pule ha ka klas Seven ha Gokul Educational Institute kaba don ha ka shnong T.Kagepura kaba hap ha Mandya District jong ka jylla Karnataka, ha kaba u la leit sha Karnataka ha u snem 2022.
La iathuh ba ha ka miet jong ka 14 tarik u Lber 2025, ki bor pyniaid jong ka skul ki la pyntip ba u Khrehlang lem bad kiwei pat ki para khynnah ki la kem pang bad la pynkit ia u sha Hospital bad kham hadien katto katne por ki la iathuh ba u la kham ioh bor, hynrei ka jingpang ka la khie biang bad dei ha ka por 4 baje ne saw shiteng ha ka step phyrngab jong ka 15 tarik u Lber 2025, ba um don shuh.
Ha kaba ia dei pat bad ka jingleit jong u Khrehlang Khongtani sha Karnataka, u bah Wanjanlang Khongtani u la iathuh ba kam dei ka seng RSS kaba ialam, hynrei la ialam da ka seng kaba la tip kum ka Lei Synshar Cultural Society. Kumta na ka liang ka iing ka sem ka la pynshai ba kam don eiei ban kynnnoh ne kynthoh iano iano.
Phi don ban ong eiei?