Ym dei ban leh shongshit, ia ka roster system, ong U Bah Ronnie

Shillong:U MLA ka Congress na Mylliem u bah Ronnie V Lyngdoh, u la ong ba kam long kaba bha ban shu leh shongshit ia ka Roster System, namar ba ka lah ban ktah pynban da kumwei.

Haba kren mynta ka sngi, u bah Ronnie u la ong ba kano kaba leh dei ban kham pyrkhat jngai, ym ban shu ioh jingmyntoi shipor kaba lah pat ban ktah hadien. “Kano kaba ngi leh, ngi kham pyrkhat jngai, lada ngi pyrkhat lyngkot, ngi tieng ioh kan ktah pat pateng la pateng. Ngim dei ban shu leh tang ban ioh jingmyntoi mynta shi khyllipmat bad kan sa ktah pat pateng la pateng” la u bah Ronnie, bad ula bynrap, “Ngi sngew burom ia ka jingkhot u Myntri Rangbah ia ka jingialang jong baroh ki seng sain pyrthei ban iakren ia ka Roster system”.

Lah ban kdew ba ka sorkar jylla ka la khot ia ka jingialang jong baroh ki seng sain pyrthei ha ka 19 tarik ban iakren ia ka roster system.
U bah Ronnie u la ong ba kum ki nongialam kim dei ban peit ne pyrkhat tang ia kawei ka jaitbynriew hynrei dei ban pyrkhat lang ia ka jingbit jingbiang lang.

“Ngi sngew ba ngin iapeit tang ia kawei ka jaitbynriew, kawei pat kan duh, kam dei, kum ki nongsynshar haba ngi shim ia kano kano ka rai, ngin hap pyrkhat lang ban myntoi lang. Hooid, ngi sngew synei ia ki samla Khasi-Pnar jong ngi hynrei ban shu shim rai kyrkieh kan long kaba mynsaw, bad kano kano kaba ngi shim kan long kaba myntoi pateng la pateng”, la ong u bah Ronnie.