Shillong: U Symbud myntri rangbah ka jylla u bah Prestone Tynsong, u la ong ba ym dei ban khang ia ki kam pynroi kiba wan na ka sorkar Assam, namar ba kane kan dei ka jingmyntoi ia ki briew ki ba sah ha ki jaka khappud.
Haba iakren bad ki lad pathai khubor u bah Prestone, u la ong ba ha ki por mynshuwa ka la don jingiakynduh hapdeng ki District Administration hapdeng ka jylla Meghalaya bad ka jylla Assam.
U bah Prestone u la ong ruh ba ki Deputy Commissioner jong kito ki jaka ki ju don ka jingiakynduh lada don kano kano ka jingia tyngkhuh kum kane ha ka ba ki la shim ia ka rai ba ym dei ban khang ia ki kam pynroi ki ba wan na Assam ne na ka jylla Meghalaya .
“Ka rai kaba la mih na ka jingia kynduh jong ki Deputy Commissioner la pynmih ia ka under standing order kaba long ba ym dei ban khang ia ka kam pynroi la kadei na ka jylla Assam ne ka jylla Meghalaya, namar kane ka dei na ka bynta ka roi ka par jong ki briew kiba sah ha ki jaka khappud” u la ong .
U bah Prestone u la ong ruh ba halor ka jing ia kajia khappud hapdeng ka jylla Assam bad ka jylla Meghalaya ka sorkar MDA, kan sa buh ia ka jingialang yn da la dep ka General election ha Assam. U la ong ruh ba ynda la wan ka sorkar thymmai ha ka jylla Assam, yn sa lah ban buh ia ka jingiakren. U la ong ruh ba ym baroh ki jaka kiba marjan bad ka jylla Assam ki don hapdeng ka jing ia kajia, hynrei don tang ki katto katne ki jaka ha ka ba ka sorkar MDA ka long kaba peitngor bad shimkhia halor kane ka bynta.
Balei ka assam pat ka khang iaka Meghalaya ban pynroi iaki kam khappud kumban maramot ia u surok ka Meghalaya pat ka shah